VERGİ İDARƏÇİLİYİNİN GÜCLƏNDİRİLMƏSİ İLƏ BAĞLI TƏDBİRLƏR GÖRÜLÜR
Azərbaycan Respublikası Prezidentinin “Sahibkarlığın inkişafına mane olan müdaxilələrin qarşısının alınması haqqında” 2002-ci il 28 sentyabr tarixli Fərmanında vergi xidməti qarşısında qoyulmuş əsas vəzifələrdən biri də vergi orqanlarının mövcud strukturunun müasir tələblərə uyğunlaşdırılması, yoxlama-nəzarət funksiyalarını həyata keçirən və müasir tələblərə cavab verməyən struktur bölmələri işçilərinin sayının ixtisar edilməsi və vergi idarəçiliyinin gücləndirilməsi ilə bağlı tədbirlərin həyata keçirilməsidir.
Vergilər Nazirliyinin ictimaiyyətlə əlaqələr şöbəsindən AZƏRTAC-a bildirmişlər ki, həmin tapşırıqların icra edilməsi, vergi administrasiyasının modernləşdirilməsi, vergi orqanlarında yeni idarəetmə modelinin qurulması və funksional strukturun tətbiq edilməsi məqsədi ilə, habelə Beynəlxalq Valyuta Fondunun tövsiyələri nəzərə alınmaqla Vergilər Nazirliyinin müvafiq əmrinə uyğun olaraq, 2002-ci il noyabrın 13-dən etibarən mövcud ərazi vergilər idarələri və onlara təhkim edilmiş şəhər və rayon vergilər idarələri (şöbələri) ləğv edilmişdir. Əmrə əsasən ləğv olunmuş 62 yerli vergi orqanlarının əvəzinə, respublikanın bütün regionlarını əhatə edən 12 yeni ərazi vergilər idarələri yaradılmışdır. Həmin idarələr Sumqayıt, Əli-Bayramlı, Lənkəran, Mingəçevir, Gəncə şəhərlərində, Quba, Şamaxı, Beyləqan, Göyçay, Qəbələ, Zaqatala və Şəmkir rayonlarında yerləşəcəklər. Aparılmış struktur dəyişiklikləri nəticəsində yerli vergi orqanları üzrə işçilərin ştat sayı təxminən 2 dəfə azaldılmışdır.
Bölmənin digər xəbərləri
