“VESTNİK AKTUALNIX PROBLEM” JURNALI AZƏRBAYCAN HAQQINDA YAZIR
AZƏRTAC-ın xüsusi müxbiri xəbər verir ki, Rusiyanın qocaman “Rodina” jurnalının əlavəsi olan “Vestnik aktualnıx problem” nəşrində tanınmış ədəbi tənqidçi Lyudmila Lavrovanın Azərbaycan, onun siyasəti və mədəniyyəti haqqında hazırladığı müxtəlif materiallar dərc olunmuşdur.
“Avraziya: inteqrasiyanın ritmi” rubrikasında Azərbaycanın Rusiyadakı səfiri Polad Bülbüloğlu jurnalın suallarına cavab vermişdir. Müsahibədə bildirilir ki, ölkələrimiz arasında münasibətlər Azərbaycanın və Rusiyanın milli mənafeləri əsas götürülməklə mehriban qonşuluq ruhunda inkişaf edir. P.Bülbüloğlu mədəniyyət və iqtisadiyyat sahələrində ikitərəfli əməkdaşlığın müxtəlif istiqamətlərini şərh etmiş, Ermənistan-Azərbaycan, Dağlıq Qarabağ münaqişəsinin həllindən danışarkən vurğulamışdır ki, Azərbaycan problemin sülh yolu ilə həlli üçün axıradək bütün imkanlardan istifadə edəcəkdir.
Həmin rubrikada tanınmış yazışı, Bakı Slavyan Universitetinin rektoru Kamal Abdullayevin məqaləsi də verilmişdir. Məqalədə ali məktəbin rus dilinin inkişafı ilə bağlı fəaliyyətindən danışılır, habelə tarixi-milli yaddaşın daşıyıcısı və mühüm ünsiyyət, mədəniyyətlərin qarşılıqlı təsir vasitəsi olan dilin problemləri təhlil edilir.
Lyudmila Lavrova “Torpağın ürəyi” məqaləsində istedadı vaxtında layiqincə qiymətləndirilməmiş tanınmış Azərbaycan rəssamı Əşraf Muraddan söhbət açır. Müəllif yazır ki, ustad vaxtsız ölümündən çox illər sonra - Qriqori Anisimovun “Əşrəf Murad: sehrli realizm” kitabının çapdan çıxmasına kömək etmiş Fransanın Fəxri leqion ordeni kavaleri, diplomat və ictimai xadim Ramiz Abutalıbovun və hazırda ABŞ-da yaşayan bakılı, geologiya-mineralogiya elmləri doktoru Yevgeni Popovun sayəsində tanınmışdır. Bu yaxınlarda Moskvadakı “Aydan” qalereyasında kitabın təqdimatı olmuşdur. L.Lavrova yazır ki, Əşrəf Murad Niko Pirosmanişvili, Anri Russo, Jorj Ruo, Kazimir Maleviç, Pablo Pikasso kimi görkəmli rəssamlarla bir sırada dayanır.
Bölmənin digər xəbərləri
