Vətən müharibəsinin sonunadək döyüşüb şəhid olan leytenant VİDEO
Samux, 11 oktyabr, Vüsalə Cənnətova, AZƏRTAC
Şanlı Azərbaycan Ordusu 44 günlük Vətən müharibəsinin nəticəsi olaraq qazandığı parlaq Qələbə ilə tariximizə Zəfər salnaməsi yazıb. Bu uğurda neçə-neçə şəhidin adı, izi qalıb. Onlardan biri olan Elvin Məmmədzadə Azərbaycanın haqq savaşının ilk günündən son gününədək döyüş yolu keçib, Vətən qarşısında borcunu şərəflə, canı-qanı bahasına ödəyib.
AZƏRTAC-ın bölgə müxbirinin verdiyi məlumata görə, Elvin İlham oğlu Məmmədzadə 1996-cı il noyabrın 22-də Samux rayonunda anadan olub. 2003-2012-ci illərdə Mirzə Ələkbər Sabir adına Samux şəhər tam orta məktəbində, 2012-2015-ci illərdə Cəmşid Naxçıvanski adına Hərbi Liseydə təhsil alıb. Şəhidin atası İlham Məmmədov bildirir ki, hərbi sahədə xidməti özünə şərəf bilən Elvin Hərbi Liseyin nümunəvi kursantlarından olub. 2015-2019-cu illərdə Heydər Əliyev adına Azərbaycan Ali Hərbi Məktəbində təhsil aldığı dövrdə də fəallığı ilə seçilib. 2019-cu ildən etibarən Azərbaycan Silahlı Qüvvələrinin “N” saylı hərbi hissəsində leytenant rütbəsində xidmət edib. O, 2020-ci il sentyabrın 27-də başlanan Vətən müharibəsinin ilk günündən ana yurdun müdafiəsinə qalxıb, Füzuli, Cəbrayıl, Zəngilan, Qubadlı və Şuşanın azadlığı uğrunda döyüşlərdə fəal iştirak edib.
“Sentyabrın 27-si gəldi, elə bil bu günü çoxdan gözləyirmiş. Döyüşlərə sevinə-sevinə qatılırmış. Onları Qubadlıya göndəriblər. Sonra isə onlara Şuşa istiqamətində hərəkət etmək göstərişi verilib. Zəng elədi, dedi ki, “ata, daha axtarmayın, lazım olsa özüm zəng edəcəyəm. İş yoldaşlarının dediyinə görə, Sarıyataqda döyüşüblər, Daşaltıda güclü döyüşləri olub. Döyüşlərdə Elvinin yüksək xidmətləri olub. Oğlumla fəxr edirəm, daim də fəxr edəcəyəm”, - deyə şəhid atası bildirir.
Azərbaycan Silahlı Qüvvələrinin leytenantı Elvin Məmmədzadə noyabrın 9-da Şuşa döyüşləri zamanı şəhid olub. Onun nəşi Samux rayonunda torpağa tapşırılıb.
“Son damla qanına qədər döyüşüb. Snayperlə vura biliblər. Qismətində şəhidlik var imiş. Əsgərləri qarşısında həmişə gözəl bir çıxışı olub. Deyib ki, “qorxmayın, şərəflə ölmək lazımdır. Bu müharibədə Vətən yolunda canımızdan keçməliyik, şərəflə döyüşməliyik, lazım gəlsə şəhid olmalıyıq”. O, vətənpərvər bir oğul idi”, - deyən İlham Məmmədov onu da qeyd edir ki, bir şəhid atası olaraq, Prezident İlham Əliyevin Sərəncamı əsasında “Heydər Əliyevin 100 illiyi (1923-2023)” yubiley medalı ilə təltif edilib. Azərbaycanın ərazi bütövlüyünün bərpa edilməsi zamanı döyüş əməliyyatlarında, düşmənin canlı qüvvəsinin və döyüş texnikasının məhv edilməsində rəşadət göstərən, vəzifə borcunu ləyaqətlə və vicdanla yerinə yetirən Elvin Məmmədzadə Prezident İlham Əliyevin sərəncamlarına əsasən, ölümündən sonra “Azərbaycan Bayrağı” ordeni, “Vətən uğrunda”, “Füzulinin azad olunmasına görə”, “Qubadlının azad edilməsinə görə”, “Şuşanın azad edilməsinə görə” medalları ilə təltif edilib.
Bölmənin digər xəbərləri
