Vidadi Rzayev: Artıq “Sabah” liqada “Qarabağ”a meydan oxuyur
Bakı, 26 yanvar, AZƏRTAC
Futbol üzrə Azərbaycan millisinin sabiq futbolçusu Vidadi Rzayev Misli Premyer Liqasının XVII turunda keçirilən oyunları şərh edib.
Bu barədə AZƏRTAC-da danışan mütəxəssis “Şamaxı”nın “Qəbələ”yə məğlubiyyətini gözlənilməz adlandırıb: “Şamaxı”nın 0:4 hesabı ilə uduzması mənim üçün sürpriz oldu. Daha bir təəccüblü hesab “Kəpəz”in “Qarabağ”ı səfərdə məğlub etməsi oldu. “Aynraxt”la ağır görüşdən sonra Qurban Qurbanovun heyətdə dəyişiklik edəcəyi gözlənilirdi. Lakin meydana çıxan ikinci heyət baş məşqçinin ümidlərini doğrultmadılar. “Kəpəz”in qələbəsini kölgə altına salmaq istəmirəm. Gəncə təmsilçisinin liqada qalacağını gözləyirəm. Ən çətin vəziyyət 6 xalla sonuncu pillədə olan “Karvan-Yevlax” komandasındadır”.
58 yaşlı mütəxəssis çempionluq uğrunda mübarizənin iki komanda arasında getməsinin sevindirici hal olduğunu bildirib: “Artıq “Sabah” liqada Ağdam klubuna meydan oxuyur. Onlar çox yaxşı formadadırlar. Kaş ki, 5-6 komanda çempionluq üçün mübarizə aparardı”.
Qeyd edək ki, Misli Premyer Liqasına 40 xalla “Sabah” başçılıq edir. “Qarabağ” 36 xalla ikinci pillədə qərarlaşıb.
Bölmənin digər xəbərləri
