Viktor Orban: Qələbə tərəfdarlarımızı seçki məntəqələrinə gətirəcəyimizdən asılıdır
Budapeşt, 19 yanvar, AZƏRTAC
Macarıstanın hakim “Fidesz” partiyası Budapeşt Konqres Mərkəzində Yerli Özünüidarəetmələrin Milli Forumunu keçirib.
AZƏRTAC xəbər verir ki, tədbirdə Macarıstanın Baş naziri Viktor Orban, dövlət idarəçiliyi və yerli inkişaf naziri Tibor Navraçiç, “Fidesz”in Budapeşt şöbəsinin sədri Aleksandra Sentkirayi, eləcə də ölkənin hər yerindən merlər və yerli özünüidarəetmə nümayəndələri iştirak ediblər.
Forumda çıxış edən Orban qarşıdan gələn seçkilərdə tərəfdarların səfərbər edilməsinin əsas vəzifə olduğunu vurğulayıb. O bildirib ki, hakim “Fidesz-KDNP” koalisiyası seçicilərin əksəriyyətinə malikdir, lakin həlledici amil yerli liderlərin və fəalların kampaniyaya qoşulması, insanları seçki məntəqələrinə gətirmək istəyi olacaq. “Əgər bu mübarizəyə qoşulsanız, biz qalib gələcəyik, əks halda məğlub olacağıq”, - deyə Baş nazir bildirib.
Tibor Navraçiç qeyd edib ki, Macarıstanın yerli özünüidarəetmə sistemi hazırda həm maliyyə, həm də siyasi cəhətdən davamlıdır. O, hökumətin regional dəstək proqramlarını xatırladıb və 12 aprel seçkilərində əldə edilən nəticələrin qorunub saxlanılmasının vacibliyini vurğulayıb.
Şəhər merləri sabit idarəetmənin, təhlükəsizliyin və dövlətlə bələdiyyələr arasında tərəfdaşlığın əhəmiyyətindən danışıblar. “Fidesz” nümayəndələri, həmçinin hökumətin Budapeştin və regionların inkişafındakı rolunu vurğulayaraq bildiriblər ki, güclü şəhərlər qüdrətli dövlətin təməlidir.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
