V.PUTİN MDB ÖLKƏLƏRİNƏ NEFT VƏ QAZ İXRACI ÜÇÜN ƏLAVƏ DƏYƏR VERGİSİNİ LƏĞV ETMİŞDİR

18.08.2004 [20:02]
Çap et
A⁺ A^-

AZƏRTAC-ın Moskvadan aldığı xəbərə görə, Rusiya Prezidenti Vladimir Putin “RF Vergi Məcəlləsinin 2-ci hissəsinə və bəzi digər qanunvericilik aktlarına dəyişikliklər edilməsi haqqında” qanun imzalamışdır.

Sənəddə Müstəqil Dövlətlər Birliyi ölkələrinin ərazisinə ixrac olunan neftin, habelə sabit qaz kondensatının və təbii qazın satışı zamanı əlavə dəyər vergisinin sıfır dərəcəsini tətbiq etmək nəzərdə tutulur.

Rusiya Prezidenti ukraynalı həmkarı Leonid Kuçma ilə Soçidə görüşündə demişdir: “Bu, Rusiya üçün çox çətin bir addım idi. Lakin biz bu addımı şüurlu surətdə atdıq. Qanunun qəbul edilməsi birinci mərhələdə Rusiya büdcəsinə ziyan vuracaqdır. Amma bu yolla bundan sonra da getsək, o, hamının xeyrinə olacaqdır”.

Lakin qanunda neft hasilatı üçün indiki vergi dərəcəsi hər tona görə 400 rubldan 410 rubladək, təbii qaz üzrə hər kubmetrə görə 107 rubldan 135 rubladək artırılır.

Xatırladaq ki, indiyədək neft və qaz ixracına görə 18 faiz həcmində əlavə dəyər vergisi tutulurdu.