Sentyabrın 27-də Prezident İlham Əliyev mədəniyyət evi ilə tanışlıqdan sonra burada rayon ictimaiyyətinin nümayəndələri ilə görüşmüşdür.

Dövlətimizin başçısı İLHAM ƏLİYEV şəhər sakinlərinə müraciətlə dedi:

- Xaçmaz gözəlləşibdir. Mən hər dəfə buraya gələndə yeniliklər -yeni binalar, gözəl parklar, yeni gözəl mənzərələr görürəm. Bu gözəl mədəniyyət sarayı da, demək olar ki, yenidən tikilibdir. Həm xarici görünüşü çox gözəldir, həm də daxildə çox gözəl işlər görülübdür. Demək olar ki, Xaçmaz ən müasir şəhərə çevrilibdir. Bu, böyük nailiyyətdir. Əlbəttə, burada rayon rəhbərliyinin böyük əməyi var. Şəmsəddin müəllimin işi çox uğurludur. Mən qeyd etdim ki, çox böyük həvəslə, ürəklə işləyir və bütün fəallar şəhərin gözəlləşməsinə öz payını verir.

İndi burada həm abadlıq işləri görülür, həm şəhər üçün lazım olan binalar tikilir, həm də köhnə binalar bərpa edilir. Necə ki, Bakıda köhnə binalar, tarixi binalar bərpa olunur və şəhər gözəlləşir. Mən bu gözəl nailiyyətlər münasibətilə sizi təbrik edirəm.

HƏQİQƏT MƏMMƏDOVA (Xaçmaz rayon həmkarlar ittifaqının sədri): Hörmətli və əziz Prezidentimiz, hamımıza əziz olan İlham Əliyev, çox sağ olun. Əvvəla, Sizi ziyalılar, ağbirçəklər adından Xaçmaz torpağında salamlayıram, xoş gəldiniz deyirəm. Qarşıdan gələn müqəddəs bayram münasibətilə Sizi təbrik edirəm.

Azərbaycan xalqı elə bir xalq, Azərbaycan elə bir ölkədir ki, maddi və mənəvi sərvətləri həmişə bol olubdur. Sizin atanız, ulu öndərimiz Heydər Əliyev bu sərvətlərin ən öndə olanı idi. Siz onun tərbiyəsi ilə böyümüsünüz, o ailədə tərbiyə almısınız. Bütün ağbirçəklər həmişə Sizə arxadır, dayaqdır və həmişə Sizdən ümid gözləyir. Bizim Prezidentimiz bizim təminatçımızdır, arxamızda dayanan bir oğlumuzdur.

Hörmətli Prezidentimiz!

Bu gün Xaçmaz camaatının Sizi xoş üzlə, xoş təbbəsümlə qarşılaması elə-belə deyildir. Vaxt var idi ki, hər bir insanın sifətində kədər ifadə olunurdu. Bu gün hamı gülür, hamı Sizi təbəssümlə qarşılayır. Ona görə ki, bu gün yaşayış tərzimiz yüksəlmişdir. Yoxsulluq həddi lap minimum səviyyəyə enmək üzrədir. Bütün regionlarda abadlıq, quruculuq işləri gedir. Dünya standartları səviyyəsində yollar salınır. Bunun hamısı Sizin sayənizdə olur və fəaliyyətinizin nəticəsidir. Siz bizim Xaçmaz camaatı haqqında, Xaçmazımız haqqında belə gözəl sözlər dediniz. Ümidvaram ki, inşallah, Allah qoysa, şəhərimiz gələcəkdə daha da inkişaf edəcəkdir. Allah Sizə yar olsun, həmişə köməyiniz olsun! Xalqımız həmişə “Heydər xalq-xalq Heydər” şüarını deyirdi. Bu gün isə deyirik ki, hamımız İlhamla irəli gedirik.

İLHAM ƏLİYEV: Çox sevinirəm ki, Xaçmazda belə gözəl işlər görülübdür. Xaçmaz doğrudan da ən müasir şəhərə çevrilir və burada yaşamaq da, işləmək də xoşdur. Xaçmazın həm gündüz, həm də gecə görüntüləri çox gözəldir. Bu, Azərbaycanda gedən inkişafın təzahürüdür.

Deyə bilərəm ki, Xaçmaz Azərbaycanın ən inkişaf etmiş rayonlarından biridir. Burada həm sənayedə, həm iqtisadi, həm də sosial sahədə böyük işlər görülür. İnsanların rahatlığı üçün böyük işlər görülür. Çox böyük zövqlə, böyük məhəbbətlə şəhər gözəlləşdirilir. Bu, çox sevindiricidır. Çünki bu onu göstərir ki, Azərbaycan hərtərəfli inkişaf edir. Aparılan islahatlar, bölgələrimizdə quruculuq, abadlıq işləri, yeni-yeni müəssisələrin yaradılması, şəhərlərin abadlaşdırılması - bütün bunlar inkişafın əlamətidir. Bu inkişaf özünü müxtəlif formalarda büruzə verir, müxtəlif formalarda göstərir. Əlbəttə ki, iqtisadi göstəricilər, bizim statistik rəqəmlərimiz, ümumi daxili məhsulun artımı - bütün bunlar reallıqdır. Ancaq adi vətəndaş ümumi daxili məhsul nədir, bunu tam təfsilatı ilə o qədər də anlaya bilmir. Ancaq məktəb, xəstəxana tikintisi, yeni yolların salınması, abadlıq, quruculuq işləri - bunlar insanların gündəlik həyatda təmasda olduğu məsələlərdir. Bax, bu sahəyə çox böyük diqqət verilir və gələcəkdə də verilməlidir. Sosial məsələlərin həlli, maaşların, pensiyaların artımı, məktəb tikintisi, səhiyyə işinin təkmilləşməsi, mədəniyyət ocaqlarının qurulması ilə yeniləşməsi - bütün bunlar Azərbaycanda var. Xaçmazda çox böyük dərəcədə bu nailiyyətlərə çatırsınız. Bu, çox sevindiricidir.

Əlbəttə ki, sosial məsələlərin həllində, şəhərlərimizin gözəlləşməsində əsas rolu oynayan bizim iqtisadi gücümüzdür. Son illər ərzində iqtisadi islahatlara çox böyük diqqət yetirilmişdir. Bu diqqətin nəticəsində və aparılan ciddi islahatlar nəticəsində Azərbaycan iqtisadiyyatı kəmiyyət, keyfiyyət baxımından, artım sürətinə görə dünya miqyasında artıq seçilir. İndi biz bunu qürur hissi ilə deyirik və deməliyik ki, dünya miqyasında bizim iqtisadiyyatımız ən yüksək sürətlə artır. Son dörd il ərzində Azərbaycanda olan iqtisadi artım dünya miqyasında hələ olmamışdır və ola bilsin ki, heç olmayacaqdır. Beş il ərzində iqtisadiyyat təxminən üç dəfə, 2,7 dəfə artmışdır. Özlərini islahatçı hesab edən ölkələrdə beş il ərzində bu artım, iqtisadiyyat artımı maksimum 60-70 fazidir. Biz də isə bundan çoxdur. Sənaye istehsalı, sosial məsələlərin həlli, təhsil, səhiyyə sahəsinə ayrılan xərclər - bütün bunlar ölkəmizin gücünü göstərir.

Bizim gücümüz bölgələrin inkişafındadır. Əlbəttə ki, gələcəkdə bizim həm iqtisadi islahatlarımız gedəcək, həm də enerji siyasətimiz davam etdiriləcəkdir. Əlbəttə, bu da bizə böyük güc verir. Ancaq bölgələrimizin inkişafı olmasaydı, bizim inkişafımız birtərəfli olardı. Məhz buna görə beş il ərzində regional inkişaf proqramının qəbul olunması çox vacib idi. Mən o vaxt bunu bilirdim.

Bu gün böyük iftixar hissi ilə deyə bilərəm ki, o proqramda nəzərdə tutulmuş bütün məsələlər öz həllini tapıbdır. Elə bir məsələ yoxdur ki, o, həll olunmamış qalsın. Üstəlik, əvvəlcədən nəzərdə tutulmamış məsələlər də həll olunur. Bax, bu mədəniyyət evinin təmiri regional inkişaf proqramında yox idi. Xaçmaz rayonunda yeni yaradılmış bir sıra obyektlər, binalar, tikintilər yox idi. Yəni biz sonradan əlavə etdik, əlavə vəsait ayırdıq. Yerlərdə daxili imkanlar hesabına çox böyük işlər görülübdür. Azərbaycan beş ildə bütün bölgələr üzrə böyük inkişaf yolu keçmişdir.

Növbəti beş ildə, əlbəttə ki, bu müsbət meyillər davam etdiriləcəkdir. Növbəti beşillik üçün proqram ondan ibarətdir ki, bütün kəndlər, qəsəbələr, şəhərlər abadlaşsın, bütün problemlər aradan qaldırılsın və ölkə uzunmüddətli, möhkəm inkişaf yoluna qədəm qoysun. Biz buna nail olacağıq. Çünki bunu etmək üçün hər şey var. Birincisi, iradə var, ikincisi, konkret proqramlar var, üçüncüsü, iqtisadi imkanlar var və artan dövlət büdcəmiz buna imkan yaradır. Dördüncüsü, xalq tərəfindən bütün proqramlara, təşəbbüslərə verilən dəstək və xalqın bu işlərdə fəal iştirakı, xalqla iqtidar arasında birlik var. Bax, bu vacib amillər hamısı birlikdə uğurlu inkişafımızı təmin edəcəkdir.

Ona görə mən heç şübhə etmirəm ki, Azərbaycan növbəti illərdə daha da sürətlə inkişaf edəcəkdir. Öz liderlik mövqelərini həm bu bölgədə, həm də geniş mənada bölgədə saxlayacaqdır. İqtisadi inkişaf sürəti artacaqdır. Sosial məsələlərin həlli üçün əlavə vəsait ayrılacaqdır. Biz yəqin ki, bu yaxınlarda növbəti ilin dövlət büdcəsini təsdiq edəcəyik. Buna Milli Məclis baxacaqdır. Yenə böyük artım var. Yenə misli görünməmiş irəliləyiş var. Altı ildə, 2003-2009-cu illər ərzində dövlət xərcləri 15 dəfə artır. Bütün bu artımlar insanların maaşlarında, pensiyalarında, abadlaşan şəhərlərdə, tikilən yollarda özünü göstərir.

Bax, mən bu gün səhər bu bölgəyə gəlirdim, yeni beton yol tikilir. Beton yollar ancaq inkişaf etmiş ölkələrdə, ancaq Avropanın böyük ölkələrində tikilir. Başqa yerdə az tikilir. Amma indi biz Bakı-Xaçmaz-Quba-Qusar yolunu betonörtüklü edirik. Bu, rahatlıq verəcəkdir. Yol tikintisi sənaye müəssisəsi deyil ki, investisiya qoyasan, sonra qayıda. Yox, bu, sadəcə olaraq, insanların rahatlığı üçün və bölgələrin inkişafı üçündür. Bu bölgənin çox böyük potensialı var. Həm kənd təsərrüfatı, həm turizm, həm də sənaye və emal müəssisələri baxımından. Xaçmaz rayonunda çox böyük intellektual potensial var, çox gözəl insanlar var. Burada çox fəal, vətənpərvər insanlar yaşayır.

Mən çox şadam ki, biz yenidən görüşürük. Son beş il ərzində bir neçə dəfə rayona gəlmişəm. Hər dəfə yenilikləri görəndə çox sevinirəm. Sizin hamınızı böyük nailiyyətlər münasibətilə ürəkdən təbrik edirəm.

Sizə yeni nailiyyətlər arzulayıram və qarşıdan gələn müqəddəs Ramazan bayramı münasibətilə təbrik edirəm.

X X X

Sonra Prezident İlham Əliyev mədəniyyət evinin qarşısında rayon ictimaiyyətinin nümayəndələri ilə xatirə şəkli çəkdirdi.

######