Xaçmazda “Şimal” futbol klubu təsis olunub
Xaçmaz, 14 sentyabr, Elxan Yusifli, AZƏRTAC
Xaçmazda təsis olunan “Şimal” futbol klubu yeni mövsümdə Azərbaycan Futbol Federasiyaları Assosiasiyası (AFFA) tərəfindən keçirilən Region Liqasında mübarizə aparacaq.
AZƏRTAC-ın bölgə müxbiri xəbər verir ki, “Şimal”ın baş məşqçisi Premyer Liqada “Simurq”, “Xəzər Lənkəran”, “Şahdağ”, “Kəpəz” və bir sıra başqa klubların, həmçinin Azərbaycan Milli komandasının heyətində çıxış etmiş Tural Cəlilov təyin olunub.
Klubun heyəti Xaçmaz və ətraf rayonlardan olan futbolçulardan təşkil edilib. Komandanın əsas üzvləri 2022-2023-cü il futbol mövsümündə “Qusar” futbol klubunun heyətində Region Liqasında çıxış edərək çempionluğa yüksəlməyi bacarıb.
Komandanın qarşıdakı mövsümdə Region Liqasında iştirakı AFFA tərəfindən təsdiqlənib. Klubun çempionatdakı ev oyunlarının SOCAR-ın Sosial İnkişaf İdarəsinin balansındakı Siyəzən şəhər stadionunda və Xaçmaz Olimpiya İdman Kompleksinin futbol meydançasında keçirilməsi nəzərdə tutulub. Yeni yaradılmasına baxmayaraq, “Şimal” futbol klubu liqada çempionluq uğrunda mübarizə aparacaq. Komanda Region Liqasında təcrübə qazandıqdan sonra növbəti illərdə Azərbaycanın II və I liqasında mübarizə aparmağı qarşıya məqsəd qoyub.
Bölmənin digər xəbərləri
