Xalqımız öz qəhrəman övladları ilə fəxr edir
Daşkəsən, 21 yanvar (AZƏRTAC). 1990-cı il yanvarın 20-də keçmiş sovet ordusunun Bakıda törətdiyi qırğından 24 il keçsə də, xalqımız o müdhiş gecənin ağrı-acılarını hələ də qəlbində yaşadır.
AZƏRTAC xəbər verir ki, respublikamızın hər yerində olduğu kimi, Daşkəsəndə də qanlı faciənin ildönümü ümumxalq hüzn günü kimi qeyd edilmişdir. Rayon rəhbərləri, Dağlıq Qarabağ müharibəsi iştirakçıları, ağsaqqallar və gənclər, eləcə də “N” saylı hərbi hissə əsgərləri rayondakı Şəhidlər xiyabanına toplaşaraq onların xatirəsinə ehtiramlarını bildirmişlər.
Rayon icra hakimiyyətinin başçısı Əhəd Abıyev mərasim iştirakçıları qarşısında çıxış edərək 20 Yanvarın xalqımızın qürur və qəhrəmanlıq səhifəsi olduğunu vurğulamış və demişdir ki, elə buna görə də xalqımız azadlıq uğrunda şəhid olan övladları ilə fəxr edir. Belə oğullardan biri də Daşkəsəndə doğulub boya-başa çatmış Ülvi Bünyadzadədir. Həmin qanlı hadisələr zamanı həlak olmuş Ülvi Bakıdakı Şəhidlər xiyabanında uyuyur.
Sonra mərasim iştirakçıları şəhid məzarları üzərinə tər qərənfillər düzmüşlər.
Bölmənin digər xəbərləri
