XARİCİ İŞLƏR NAZİRLİYİNDƏ GÖRÜŞ
Azərbaycanın xarici işlər naziri Vilayət Quliyev ölkəmizdə səfərdə olan Kanadanın dövlət katibi Qar Nutsonun başçılıq etdiyi nümayəndə heyəti ilə görüşmüşdür.
Nazirliyin mətbuat mərkəzindən AZƏRTAC-a daxil olmuş məlumatda deyilir ki, Vilayət Quliyev bu səfərin Kanada ilə Azərbaycan arasında dostluq münasibətlərinin möhkəmlənməsi və işgüzar əlaqələrin genişlənməsi üçün faydalı olacağını bildirmişdir. O, Kanada və Azərbaycan parlamentlərarası dostluq qruplarının fəaliyyətini yüksək qiymətləndirmiş, əlaqələrin digər səhələrdə də genişlənməsinə, habelə beynəlxalq təşkilatlar çərçivəsində səmərəli əməkdaşlığın davam etdirlməsinə tərəfdar olduğunu söyləmişdir.
Nazir Vilayət Quliyev Ermənistan-Azərbaycan, Dağlıq Qarabağ münaqişəsinin kökləri, onun həlli sahəsində görülən işlər, ATƏT-in Minsk qrupunun bu istiqamətdə fəaliyyəti barədə qonağa ətraflı məlumat vermiş, beynəlxalq hüququn prinsip və normaları əsasında problemin tezliklə aradan qaldırılması üçün beynəlxalq birliyin səylərinin artırılmasının vacibliyini bildirmişdir.
Cənab Qar Nutson Azərbaycanla əlaqələrin bütün sahələrdə inkişaf etdirilməsinə Kanada tərəfinin böyük əhəmiyyət verdiyini, beynəlxalq təşkilatlarda daha sıx əməkdaşlığın davam etdirilməsinin zəruriliyini vurğulamışdır.
Dövlət katibi Ermənistan-Azərbaycan münaqişəsinin beynəlxalq birliyin səyləri əsasında tezliklə sülh yolu ilə həll ediləcəyinə ümidvar olduğunu söyləmişdir.
Görüşdə qarşılıqlı maraq doğuran bir sıra məsələlər də müzakirə edilmişdir.
Bölmənin digər xəbərləri
