“Xatirələr sahilində” sənədli filmi nümayiş olunub VİDEO
Bakı, 6 fevral, Göyçək Mahmudlu, Şövqi Əzizov, AZƏRTAC
Fevralın 6-da Nizami Kino Mərkəzində Azərbaycan sənədli kinosunun formalaşmasında mühüm rol oynamış Xalq artisti, kinorejissor Yalçın Əfəndiyevin yaradıcılıq yoluna və sənət irsinə həsr olunmuş “Xatirələr sahilində” sənədli filminin nümayişi keçirilib. "AzərNyuMedia" tərəfindən istehsal olunan filmin ssenari müəllifi, quruluşçu rejissoru və prodüseri Kamran Qasımov, təsvir rejissorları Rafiq Əliyev və Arif Zeynalov, bəstəkarı Yaşar Baxışdır.
AZƏRTAC xəbər verir ki, tədbirdə çıxış edən filmin ssenari müəllifi və quruluşçu rejissoru, "AzərNyuMedia" şirkətinin direktoru Kamran Qasımovun sözlərinə görə, orta nəsil, o cümlədən gənc kinematoqrafçılar arasında elə birisi yoxdur ki, Yalçın Əfəndiyevin adı onun həyatından keçməsin.
O, Y.Əfəndiyev barəsində deyib: "O, son dərəcə xeyirxah, ziyalı və ən yüksək insani keyfiyyətlərə malik şəxsiyyət idi. Biz onun vəfatından sonra, 2020-ci ildə çəkilişlərə başladıq. Çəkiliş dövründə ölkəmizdə və dünyada müxtəlif hadisələr yaşandı və filmin ərsəyə gəlməsi beş il zaman aldı. Hətta ekran işində yer alan müsahiblərin bəziləri artıq həyatda yoxdur. Bu işdə bizə dəstək göstərən hər kəsə təşəkkür edirəm".
Əməkdar incəsənət xadimi, kinorejissor Cəmil Quliyev, Xalq yazıçısı Natiq Rəsulzadə Y.Əfəndiyev barədə xatirələrini bölüşüb, onun həm rejissor, həm pedaqoq, həm də insan kimi müsbət keyfiyyətlərindən danışıblar. Natiqlər Y.Əfəndiyevin kino sahəsində ensiklopedik biliklərə malik şəxs olduğunu, onun yoxluğunun böyük boşluqlar yaratdığını deyiblər. Həmçinin Xalq artistinin milli kinematoqrafiyamıza verdiyi töhfələrdən söhbət açıb, filmi onun xatirəsinə həsr olunmuş kiçik abidə adlandırıblar.
Yalçın Əfəndiyevin ailə üzvləri adından oğlu İbrahim Əfəndiyev çıxış edərək göstərilən diqqətə və verilən yüksək dəyərə görə ölkə rəhbərliyinə minnətdarlığını bildirib, filmin ərsəyə gəlməsində əməyi olan hər kəsə təşəkkür edib.
Daha sonra "Xatirələr sahilində" sənədli filmi nümayiş etdirilib.
Film böyük maraqla qarşılanıb.
Qeyd edək ki, "Xatirələr sahilində" Mədəniyyət Nazirliyi tabeliyində fəaliyyət göstərən Azərbaycan Respublikasının Kino Agentliyinin elan etdiyi postprodakşn mərhələsində olan filmlər arasında keçirilən “2025-ci il üzrə filmlərə dəstək müsabiqəsi”ndə qalib gəlib.
Bölmənin digər xəbərləri
