Türkiyədə meyvə şirələrində şəkərəvəzləyicilərdən istifadəyə tam qadağa qoyulur
Ankara, 3 sentyabr, AZƏRTAC
Türkiyədə qablaşdırılmış meyvə şirələrində şəkəri əvəz etmək üçün süni şəkərəvəzləyicilərdən istifadəyə tam qadağa qoyulması, nektarlarda isə şəkərəvəzləyicilərdən yalnız müəyyən şərtlər daxilində istifadə edilməsi planlaşdırılır.
AZƏRTAC xəbər verir ki, təşəbbüs Türkiyənin Kənd Təsərrüfatı və Meşəçilik Nazirliyinə məxsusdur. Qurum milli standartlar sistemini Avropa İttifaqının normalarına uyğunlaşdırmağa çalışır.
Təklifin yaxın vaxtlarda qəbul ediləcəyi təqdirdə, konsentrat, püre və ya toz şəklində olan bütün meyvə şirələrində şəkərəvəzləyicilərdən istifadə tamamilə aradan qaldırılacaq.
Bununla yanaşı, nektar istehsalçıları daha geniş imkanlar əldə edəcəklər. Belə ki, az kalorili meyvə nektarlarında şəkərin müəyyən hissəsini dadlandırıcılarla əvəz etmək mümkün olacaq.
Təkliflərdə təbii şəkərin miqdarı azaldılmış məhsullara da ayrıca yer verilir. Yeni təkliflərə əsasən, Türkiyədə təbii şəkərin miqdarı ən azı 30 faiz azaldılmış yeni nəsil meyvə şirələrinin istehsalına və satışına icazə veriləcək.
Mütəxəssislərin məlumatına görə, Türkiyədə hər il adambaşına 10 litr meyvə şirəsi istehlak olunur.
Bölmənin digər xəbərləri
