XƏZƏR DƏNİZİNİN ABŞERON ARXİPELAQI TƏDQİQ OLUNUR
Bakı, 4 avqust (AZƏRTAC). Azərbaycan Respublikası Dövlət Neft Şirkəti Ekologiya İdarəsinin ekoloji monitorinq departamenti tərəfindən “Abşeronneft” NQÇİ-nin istismarında olan “Gürgan-dəniz”, “Qərbi Abşeron”, “Abşeron bankası” neft-qaz yataqlarında “MPK-452” tədqiqat gəmisi vasitəsilə ekoloji tədqiqat işləri aparılmışdır.
Şirkətdən AZƏRTAC-a verilən məlumata görə, ekspedisiyanın məqsədi yataqların ərazilərində ətraf mühitin mövcud vəziyyətinin monitorinqini həyata keçirməklə, istismar müddətində həmin ərazilərdə baş vermiş ekoloji dəyişiklikləri öyrənmək, antropogen təsirin dərəcəsini müəyyənləşdirmək, flora və faunaya göstərilən təsirləri, dəniz canlılarının say və növ müxtəlifliyində dəyişikliklərin dinamikasını müəyyənləşdirməkdir.
İlkin monitorinq zamanı dənizin dib çöküntülərindən, müxtəlif dərinliklərdən kimyəvi, mikrobioloji, fitoplankton, zooplankton və bentos təhlillər üçün nümunələr götürülmüş, axınların sürəti və istiqaməti ölçülmüşdür.
Nümunələr kompleks tədqiqat laboratoriyasında təhlil olunur.
Bölmənin digər xəbərləri
