Xocalı faciəsinin 20 illiyi ilə əlaqədar “Əl-Əhram İnternational” qəzetində məqalə dərc edilmişdir
Bakı, 2 Mart (AZƏRTAC). Xocalı faciəsinin 20 illiyi ilə əlaqədar bir milyon tirajla çap olunan və ərəb dünyasının ən nüfuzlu gündəlik qəzetlərindən biri olan “Əl-Əhram İnternational” qəzetinin 27 fevral tarixli sayında Qahirə Türk Araşdırmaları Mərkəzinin nəzdində Azərbaycan araşdırmalar bölməsinin rəhbəri doktor Əhməd Sami El Aydininin “Xocalı faciəsi: müasir Azərbaycan tarixinin qanlı səhifəsi” sərlövhəli geniş məqaləsi dərc edilmişdir.
AZƏRTAC xəbər verir ki, məqalədə Ermənistan Silahlı Qüvvələrinin keçmiş sovet ordusunun Xankəndidə yerləşən 366-cı motoatıcı alayının köməyi ilə 1992-ci il fevralın 26-da Xocalı şəhərinə hücumu barədə geniş məlumat verilmişdir. Bildirilir ki, bu hücum zamanı 106-sı qadın, 63-ü uşaq, 70-i yaşlı olmaqla, 613 nəfər azərbaycanlı vəhşicəsinə qətlə yetirilmiş, 1275 nəfər əsir düşmüş və girov götürülmüşdür. Müəllif ermənilərin Azərbaycan torpaqlarının 20 faizini işğal etməsini və minlərlə günahsız insanı öldürməsini, bir milyondan çox insanın qaçqın və məcburi köçkün halında yaşamağa vadar etməsini ürək ağrısı ilə qeyd etmişdir.
Məqalədə, Xocalı faciəsinin törədilməsi ilə Ermənistan tərəfindən Cenevrə konvensiyalarının, insan hüquqları haqqında universal bəyannamənin, Mülki və siyasi hüquqlar haqqında beynəlxalq konvensiyanın kobud şəkildə pozulduğunu bildirmişdir.
Xocalının strateji əhəmiyyətindən və tarixindən bəhs edən müəllif Xocalı əməliyyatının dəqiqliklə planlaşdırılmış hərbi əməliyyat olduğunu vurğulamış, bu faciə ilə əlaqədar Fransa, Almaniya, Rusiya, İngiltərə və ABŞ jurnalistlərinin yazdıqlarından konkret sitatlar gətirmiş, ermənilərin özləri tərəfindən də Xocalı soyqırımının etiraf olunduğunu ərəbdilli oxucuların diqqətinə çatdırmışdır. Xocalı faciəsi ilə əlaqədar Ermənistan prezidenti Serj Sarkisyanın məlum etiraflarından bəhs edən Əhməd Sami El Aydini Livanda yaşayan və əslən erməni olan jurnalist David Jeriyanın “Xaç naminə” kitabına istinad edir. Erməni jurnalist polkovnik Ohanyan adlı şəxslə birlikdə qətlə yetirilmiş azərbaycanlıları tapdalayaraq keçdiklərini və polkovnik Ohanyanın 9-10 yaşlı öldürülmüş azərbaycanlı uşağın cəsədini qəddarcasına tapdaladığını və istehza ilə ona qorxma dediyini yazır. David Jeriyan öz kitabında ayağının və şalvarının büsbütün qana bulaşdığını, 1200-ə qədər azərbaycanlının cəsədini gördüyünü qeyd etmişdir.
Xocalı soyqırımını dünyaya bəyan etmək üçün Azərbaycan tərəfindən ciddi addımların atıldığını yazan müəllif Heydər Əliyev Fondunun vitse-prezidenti Leyla xanım Əliyevanın təşəbbüsü ilə qlobal miqyasda “Xocalıya ədalət kampaniyası”nın başlandığını və bütün dünyada uğurlu fəaliyyət göstərdiyini qeyd etmiş, İndoneziyada keçirilmiş İslam konfransı Təşkilatının parlament sessiyasında Xocalı ilə əlaqədar qətnamənin qəbul olunduğunu oxucuların diqqətinə çatdırmışdır.
Ermənistan qoşunlarının qeyd-şərtsiz Azərbaycanın işğal olunmuş ərazilərindən çıxarılması üçün BMT Təhlükəsizlik Şurasının 822, 853, 874 və 884 saylı qətnamələr qəbul etdiyini yazan jurnalist Ermənistanın hələ də bu sənədlərə məhəl qoymadığını xüsusi qeyd etmişdir.
Fələstində olduğu kimi Xocalı faciəsində də “özünü müdafiə” adı altında müsəlmanların öldürüldüyünü yazan jurnalist oxucuları bu kimi hadisələri xatırlamaqla, belə əməllərin Fələstində, Azərbaycanda və digər müsəlman torpaqlarında təkrarlanmasının qarşısını almağa çağırmışdır.
Bölmənin digər xəbərləri
