Xocalı sakini: Erməni əsgərləri məni yandırmaq üçün üzərimə benzin tökmüşdülər
Bakı, 26 fevral, AZƏRTAC
1992-ci il fevralın 25-dən 26-na keçən gecə mən Xocalıda post komandiri işləyirdim. Saat 21.30-da Xocalı dörd tərəfdən mühasirəyə alındı. Elə bir vəziyyət yaranmışdı ki, oradan sağ-salamat çıxmaq heç cür mümkün deyildi. Ermənilərin məqsədi Xocalını birdəfəlik yer üzündən silmək idi. Onlar mənfur niyyətlərini həyata keçirdilər və xocalılara misli görünməmiş divan tutdular. Mən onların dinc və günahsız insanları necə vəhşicəsinə qətlə yetirdiklərinin şahidi oldum.
Bu sözləri AZƏRTAC-a müsahibəsində “Ana harayı” abidəsini ziyarət edən Xocalı şəhər sakini Hüseynağa Quliyev deyib.
Hüseynağa Quliyev yaşadığı və şahid olduğu həmin hadisələri belə xatırlayır: “Həmin gecə ağır yaralandım və ermənilərə əsir düşdüm. Erməni əsgərləri məni yandırmaq üçün üzərimə benzin də tökmüşdülər. Onlar hər gün bizi döyürdülər. Əsirlikdə erməni qadınlarının günahsız insanların başına necə dəhşətli hadisələr gətirdiklərinin də şahidi oldum. Onlar hamilə qadınları, uşaq və qocaları vəhşicəsinə qətlə yetirir, acımadan onların başlarını kəsirdilər. Bu, insanlığa qarşı vəhşilik idi. Xocalı hadisələrində yaşadıqlarımı və gördüklərimi heç vaxt unutmayacam. Xocalıda həlak olan soydaşlarımızın qisasını almaq üçün torpaqlarımızı geri qaytarmalıyıq”.
Bölmənin digər xəbərləri
