Xocalı soyqırımı qeyri-insani cəza üsulları ilə bəşər tarixində görünməmiş vəhşilikdir
Ağsu, 26 fevral, AZƏRTAC
Təpədən dırnağadək silahlanan erməni daşnaklarının Xocalıda törətdikləri qətliam insanlığa sığmayan bir vəhşilikdir. İyirmi altı il əvvəl fevralın 25-dən 26-na keçən gecə Xocalı büsbütün yandırıldı, 613 nəfər qətlə yetirildi. Uşaqlar, qadınlar, qocalar xüsusi amansızlıqla öldürüldü. Girov götürülən 26 uşağın, 68 qadının taleyi bu günədək məlum deyil...
AZƏRTAC-ın bölgə müxbiri xəbər verir ki, bu barədə fevralın 26-da Ağsu Rayon İcra Hakimiyyətində Xocalı soyqırımının ildönümü ilə əlaqədar keçirilən “dəyirmi masa”da məlumat verilib. İştirakçılar öncə faciə qurbanlarının xatirəsini bir dəqiqəlik sükutla yad edib, Xocalı qətliamından bəhs edən sənədli filmə baxıblar.
Rayon icra hakimiyyətinin başçısı Ənvər Seyidəliyev, başçının müavini - ictimai-siyasi və humanitar məsələlər şöbəsinin müdiri Sevil Mirzəliyeva, Nuran-Xatun məscidinin imamı Nurəddin İslamov, Xocalı sakini Əmrah Məmmədov və başqaları törədilən soyqırımıdan, bu qırğının dəhşətli nəticələrindən danışıblar.
Çıxışçılar ümummilli lider Heydər Əliyevin hakimiyyətə qayıdışından sonra Xocalı faciəsinə hüquqi-siyasi qiymətin verildiyini bildirərək, soyqırımı haqqında həqiqətlərin dünya ölkələrinə, beynəlxalq ictimaiyyətə çatdırılması istiqamətində mühüm tədbirlərin görüldüyünü vurğulayıblar.
X X X
Kürdəmirdəki Heydər Əliyev Mərkəzində Xocalı soyqırımının 26-cı ildönümü ilə əlaqədar anım mərasimi keçirilib.
AZƏRTAC-ın bölgə müxbiri xəbər verir ki, əvvəlcə rayon icra hakimiyyətinin başçısı Ceyhun Cəfərov Kürdəmirdə müvəqqəti məskunlaşan Xocalı sakinləri ilə görüşüb, onların qayğıları ilə maraqlanıb. İcra hakimiyyətinin başçısı erməni qəsbkarları tərəfindən xalqımızın dəfələrlə soyqırımına məruz qaldığını, Xocalı qətliamının bu soyqırımlarının ən dəhşətlilərindən olduğunu diqqətə çatdırıb. Vurğulayıb ki, bir gecədə aralarında uşaqların, qadınların, qocaların olduğu 613 nəfər sakin xüsusi qəddarlıqla öldürülüb.
Ceyhun Cəfərov ulu öndər Heydər Əliyevin qətiyyəti sayəsində Xocalı faciəsinə hüquqi-siyasi qiymətin verildiyini bildirərək vurğulayıb ki, həyata keçirilən məqsədyönlü siyasət nəticəsində bir sıra dünya ölkələri, beynəlxalq təşkilatlar bu soyqırımını tanıyıblar.
Tədbir çərçivəsində iştirakçılar məktəblilərin ifasında “Xocalı səsləyir bizi” adlı ədəbi-bədii kompozisiyaya, əl işlərindən ibarət “Xocalı soyqırımı uşaqların gözü ilə” adlı rəsm sərgisinə baxıblar.
Anım mərasiminin sonunda Xocalı sakini Elmar Şahverdiyev acı xatirələrini bölüşüb, dövlət səviyyəsində onlara göstərilən diqqət və qayğıdan danışıb.
X X X
Xalqımızın tarixinə qanla yazılan Xocalı soyqırımının 26-cı ildönümü Şamaxıda ictimaiyyətin çoxsaylı nümayəndələrinin iştirakı ilə qeyd olunub.
AZƏRTAC-ın bölgə müxbiri xəbər verir ki, mərasim iştirakçıları əvvəlcə şəhərdəki Soyqırımı abidəsini ziyarət edib, önünə tər qərənfillər düzüblər. Sonra Şamaxı şəhər İncəsənət Təhsili Mərkəzində davam etdirilən tədbirdə Xocalı faciəsini əks etdirən rəsm sərgisinə baxış olub, soyqırımı qurbanlarının xatirəsi bir dəqiqəlik sükutla anılıb.
Rayon icra hakimiyyətinin başçısı Asif Ağayev çıxış edərək faciəli günün tarixinə nəzər salıb, insanlıq sifətini itirən ermənilər tərəfindən törədilən bu faciənin təkcə azərbaycanlılara qarşı deyil, həm də bütün bəşəriyyətə yönələn qanlı cinayət olduğunu diqqətə çatdırıb.
Vurğulanıb ki, 1993-cü ildə xalqın təkidli tələbi ilə ümummilli lider Heydər Əliyevin yenidən hakimiyyətə qayıdışından sonra Xocalı faciəsinə əsl hüquqi-siyasi qiymət verilib. Daha sonra Azərbaycan Respublikasının Milli Məclisi fevralın 26-nın "Xocalı soyqırımı günü" kimi qeyd olunması haqqında qərar qəbul edib və törədilən cinayət barədə BMT-yə, eləcə də bütün beynəlxalq təşkilatlara məlumat verilib.
Sonra tədbir Azərbaycan Dövlət Pedaqoji Universitetinin Şamaxı filialının tələbələrinin və şəhər Məhəmməd Hadi adına 9 saylı tam orta məktəbi şagirdlərinin hazırladıqları “26 fevral Xocalı faciəsi uşaqların gözü ilə” mövzusunda ədəbi-bədii kompozisiya ilə davam etdirilib.
Anım mərasiminin sonunda “Xocalı qətliamı” adlı sənədli filmə baxış olub.
X X X
Xocalı soyqırımının 26-cı ildönümü Qobustan rayonunda ictimaiyyət nümayəndələrinin iştirakı ilə anılıb.
AZƏRTAC-ın bölgə müxbiri xəbər verir ki, mərasim iştirakçıları əvvəlcə Şəhidlər xiyabanına gələrək vətən yolunda canlarını qurban verən şəhidlərimizin xatirəsini ehtiramla yad ediblər.
Rayon icra hakimiyyətinin akt zalında təşkil olunan anım mərasimində iştirakçılar məktəblilərin ifasında “Xocalı soyqırımı - qan yaddaşımızın fəryadı” adlı ədəbi-bədii kompozisiyaya baxıblar.
İcra hakimiyyətinin başçısı Adil Məmmədov, eləcə də digər çıxış edənlər Xocalı qətliamının dəhşətlərini bir daha diqqətə çatdırıblar. Bildirilib ki, Xocalı şəhərinin 5379 nəfər əhalisi bir gecədə deportasiyaya məruz qalıb, 613 nəfər qətlə yetirilib, 8 ailə məhv edilib, 1275 nəfər əsir və girov götürülüb. Vurğulanıb ki, Xocalı soyqırımı öz qəddarlığı, qeyri-insani cəza üsulları ilə bəşər tarixində görünməmiş vəhşilikdir.
X X X
İsmayıllıda Xocalı faciəsinin ildönümü ilə əlaqədar fevralın 26-da “Ana harayı” abidəsi ziyarət edilib.
AZƏRTAC-ın bölgə müxbiri xəbər verir ki, səhər saat 10-da şəhərin mərkəzi meydanında toplaşan 6 mindən çox sakin əllərində faciə səbəbkarlarını lənətləyən, gəncləri mübarizəyə səsləyən plakatlar tutaraq soyqırımı abidəsinədək yürüş ediblər. Abidənin qarşısında dövlət qulluğu veteranı Valeh Salehov erməni millətçilərinin zaman-zaman xalqımıza qarşı törətdiyi cinayətlərdən danışıb. O, Xocalı faciəsi haqqında həqiqətlərin dünya ictimaiyyətinə çatdırılması, onun soyqırımı kimi tanıdılması üçün dövlətimiz tərəfindən məqsədyönlü və ardıcıl iş aparıldığını diqqətə çatdırıb.
Sonra “Ana harayı” abidəsinin və Qarabağ müharibəsində şəhid olan vətən övladlarının adları yazılan lövhələrin önünə gül dəstələri qoyulub.
Yürüş-ziyarətdən sonra İsmayıllı şəhər Mədəniyyət Mərkəzində Xocalı faciəsinin 26-cı ildönümünə həsr olunan ədəbi-bədii kompozisiya nümayiş etdirilib.
Bölmənin digər xəbərləri
