Xocalı soyqırımına beynəlxalq səviyyədə hüquqi, siyasi qiymət verilməlidir
Tbilisi, 26 fevral, AZƏRTAC
Biz Xocalı faciəsi ilə bağlı həqiqətləri dünyaya çatdırmaq və bu qanlı faciəyə beynəlxalq səviyyədə hüquqi qiymət verilməsinə nail olmalıyıq.
AZƏRTAC xəbər verir ki, bu sözləri Azərbaycanın Gürcüstandakı səfiri Dursun Həsənov jurnalistlərə açıqlamasında deyib.
Diplomat bildirib ki, Heydər Əliyev Fondunun vitse-prezidenti Leyla Əliyevanın başlatdığı “Xocalıya ədalət!” kampaniyası çərçivəsində səfirlik silsilə tədbirlər hazırlayıb. Artıq Gürcüstanın bölgələrində və paytaxt Tbilisidə anım mərasimləri keçirilib. Yerli mətbuatda Xocalı soyqırımından bəhs edən yazılar dərc olunub. Bu gün səfirlikdə qanvermə aksiyası təşkil edilib.
Səfir vurğulayıb ki, Xocalı faciəsinə beynəlxalq səviyyədə hüquqi qiymət verilməsi istiqamətində mübarizə də davam edir: “Bununla bağlı ulu öndərimiz Heydər Əliyevin başlatdığı siyasət Prezident İlham Əliyev tərəfindən uğurla aparılır. Biz də səfirlik olaraq bu istiqamətdə fəaliyyətimizi davam etdirəcəyik".
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
