Bakı, 27 fevral, AZƏRTAC

Xocalı soyqırımının baş verdiyi o dəhşətli gecədən 31 il keçir. 31 il insanlığın böyük tarixi qarşısında çox kiçik bir dönəmdir. Lakin bizim üçün 31 il 31 ildən çoxdur, 31 ildən dərindir və ağırdır!..

Son 3 il istisna olmaqla Xocalı soyqırımının əvvəlki ildönümlərini daha ağır keçirmişik. Bəs necə, nəyə inanaraq dözmüşük? Biz kinli deyilik, heç nifrət dağarcığı da deyilik. Bizi intiqam və inam diri saxladı! İntiqam halal haqqımızdı, inam xəlqi əsalətimizdən irəli gəlirdi. Bilirsiniz, uzağa getməyək, 2020-ci ilin 44 günlük Vətən müharibəsi göstərdi ki, biz ləyaqətli müharibə aparırıq - müharibədə qızıl ləyaqət göstəririk! Qarşımızdakı tayfafason yaratıqlar isə dünya haylarının murdar əməllərindən, hərbi-siyasi cəhətdən güclü dünya dövlətlərinin ikili standartlarından yararlanaraq, müharibədə də, diplomatik danışıqlarda da ləyaqətsiz, etibarsız davranıblar.

Nəhayət, vaxt gəlib, vədə yetişib və heç bir hay, hayları maşa kimi kullanan heç bir “haysevər” bizə nəyisə diktə edə bilmir, qəbullandıra bilmir. Artıq hər kəs anlayır ki, vaxt uzatmaq, danışıqları pozmaq anlamsızdır, haylar üçün heç bir perspektiv vəd etmir. Bunu anlamaq gərək heç kəs üçün çətin olmasın ki, ağır işğal illərində bizə öz yaramaz şərtlərini diktə edə bilməyənlər, tarixi Zəfərdən sonra bunu zatən edə bilməzlər! Prezident İlham Əliyevin Ali Baş Komandanı olduğu şanlı Ordu barmağı tətikdə və düşmənin başının üstündədir! Bir ufacıq yanlışlıq belə bağışlanmayacaq! “Dəmir yumruq” həm Zəfərin, hərbi qüdrətin, həm də ümumxalq birliyinin ifadəsi, təntənəsidir!

Bu fikirlər Beynəlxalq "Alaş" Ədəbiyyat Mükafatı laureatı, şair-publisist Əkbər Qoşalının AZƏRTAC-a təqdim etdiyi “Xocalı, Xocalım, Xocalımız…” sərlövhəli yazısında yer alıb. Yazını təqdim edirik.

Biz Xocalıya indi daha yaxınıq, əlbəttə! Əlbəttə, Xocalıda qanunsuz məskunlaşmış yadellilər hər keçən gün daha dərindən idrak edir ki, bizim torpaqlardan onlara yurd olan deyil. Kim adam balası kimi Azərbaycanın şəxsiyyət vəsiqəsinin şərəfini anlayacaqsa, dövlətimizin uyğun bildiyi ünvanda yaşayacaq, kim müharibə cinayətlərində iştirak edibsə, cəzasını alacaq. Burada Azərbaycan Respublikasının humanizm prinsiplərinə ümid etmək üçün öz günahlarını bir an öncə etiraf etmək, müstəqil Azərbaycan dövlətinin ədalətinə sığınmaq ən doğru yol olacaq. Arayik-marayiklə, Vardanyan-yoxdanyanla zadla iş yürüməz. Tək bir yol vardır: Torpağın əsl sahiblərinə güvənmək, sığınmaq və bağışlanmaq diləmək. Bu, bizim torpaqlardan rədd olub gedəcəklərə də aiddir. Çünki sabah-birisi gün Azərbaycan Respublikası ərazisinə giriş yaparkən elektron tablolarda axtarışda, cinayət məsuliyyətində olduğu anındaca görünəcəkdir.

Xocalı xocasız dünyanın ümumi dərdidir. Bunu Xocalı soyqırımının 16 dövlət tərəfindən soyqırımı kimi tanınmasına dair qətnamənin qəbulu da sübut edir. Meksika, Pakistan, Kolumbiya, Çexiya, Rumıniya, Sudan, Honduras, Bosniya və Herseqovina, Sloveniya, Peru, İordaniya, Cibuti, Şotlandiya, Panama, Qvatemala, Latviya, həmçinin ABŞ-nin 24 ştatı Xocalı soyqırımını tanıyıb.

Qardaş Türkiyənin bir neçə bələdiyyəsinin ərazisində Xocalı soyqırımı qurbanlarının, şəhidlərimizin xatirə abidəsi ucaldılıb, habelə Qarabağ parkları açılıb. Əlbəttə, ortaq türk qurumlarının, türk ölkə və topluluqlarının taleyüklü məqamlarda bizim dərdimizi bölüşüb azaltdığını, sevincimizi bölüşüb çoxaltdığını bilirik. 44 günlük müharibədən sonra isə yeni gerçəkliklər yaranıb və bu gerçəkliklər Orta Asiyadakı qardaşlarımızı daha da ürəkləndirib, böyük gələcəyə inandırıb. O böyük gələcək Zəngəzur dəhlizindən keçəcək, Xocalıda dalğalanacaq üçrəngli müqəddəs Azərbaycan bayrağından ilham alacaq!