Xorvatiya qaz təchizatında problem gözləmir, Krk LNG terminalının gücü artırılacaq
Zaqreb, 26 iyul, AZƏRTAC
Xorvatiya qlobal mayeləşdirilmiş təbii qaz (LNG) bazarında davam edən qeyri-müəyyənlik və Yaxın Şərqdəki gərginliyə baxmayaraq, 2026-cı ildə ölkədə qaz təchizatında heç bir problem gözləmir.
AZƏRTAC xəbər verir ki, bu barədə Krk adasında yerləşən LNG terminalının direktoru İvan Fuqar bildirib. Onun sözlərinə görə, Hörmüz boğazı ətrafında yaranmış böhran və Qətərdən LNG tədarükünün azalması ilə bağlı narahatlığa baxmayaraq, bu il üçün planlaşdırılmış bütün LNG daşıyıcı gəmilərinin qrafikə uyğun olaraq terminala çatması gözlənilir.
İ.Fuqar qeyd edib ki, hazırda Krk LNG terminalının illik reqazifikasiya gücü təxminən 3,5 milyard kubmetrdir. Boru kəməri layihələrinin başa çatdırılmasından sonra 2027-ci ilin ikinci rübündə bazara əlavə 1 milyard kubmetr qaz çıxarmaq mümkün olacaq. Bununla terminalın ümumi illik gücü 4,3–4,5 milyard kubmetrə yüksələcək.
Terminal rəhbəri bildirib ki, mövcud ötürmə gücləri artıq 2037-ci ilin oktyabr ayınadək tam bron edilib. Bu, Krk LNG terminalına Avropa bazarında uzunmüddətli tələbatın yüksək olduğunu göstərir.
2021-ci ildən fəaliyyət göstərən Krk LNG terminalı Xorvatiyanın enerji strategiyasının əsas layihələrindən biri hesab olunur. Terminal Mərkəzi və Cənub-Şərqi Avropa ölkələrinin qaz təchizatının şaxələndirilməsinə xidmət edir.
Bölmənin digər xəbərləri
