“YADDAN ÇIXMAZ QARABAĞ” ADLI ƏNƏNƏVİ İNCƏSƏNƏT HƏFTƏSİ KEÇİRİLƏCƏKDİR
Mədəniyyət və Turizm Nazirliyi gənc nəslin vətənpərvərlik ruhunun yüksəlməsi, Qarabağ mövzusuna həsr olunmuş sənət əsərlərinin təbliği məqsədi ilə oktyabrın 2-dən 8-dək “Yaddan çıxmaz Qarabağ” adlı ənənəvi ümumrespublika mədəni-siyasi aksiya - incəsənət həftəsi keçirəcəkdir.
Nazirliyin mətbuat xidmətindən AZƏRTAC-a bildirmişlər ki, aksiya çərçivəsində ölkəmizin mədəniyyət müəssisələrində “Açıq qapı günü” elan ediləcəkdir. Bu münasibətlə Sumqayıt, Gəncə, Lənkəran, Şəki şəhərlərində və digər rayonlarda toplantılar, görüşlər, kitab müzakirələri keçiriləcək, sərgilər təşkil olunacaq, dövlət teatrlarında və cəbhə bölgələrində bu mövzuda tamaşalar göstəriləcəkdir.
“Yaddan çıxmaz Qarabağ” incəsənət həftəsinin keçirilməsi ilə əlaqədar geniş tədbirlər planı hazırlanmışdır. Həmin günlərdə Milli Parkda asfalt üzərində “Qarabağ uşaqların gözü ilə” rəsm aksiyası, “Yaddan çıxmaz Qarabağ” fotosərgisi, “Qarabağın avazı” adlı konsert proqramı, Horadiz şəhərinin uşaq musiqi məktəblərində ustad dərsləri, “Mənim Qarabağım” mövzusunda respublikanın tanınmış yazıçı və ziyalıları ilə görüşlər keçiriləcək, Azərbaycan Dövlət Mahnı Teatrında “Yaddan çıxmaz Qarabağ” adlı konsert təşkil olunacaqdır.
Bakı teatrlarının səhnəsində V.Adıgözəlovun “Natəvan” operası, H.Mirələmovun “Xəcalət”, E.Abdullayevanın “Ağ qayıq” əsərlərinin tamaşaları göstəriləcək, “Nizami”, “Araz”, “Vətən”, “Dostluq” kinoteatrlarında “Arxada qalmış gələcək”, “Ağ atlı oğlan”, “Girov”
bədii, “Haray”, “9 dəqiqə” sənədli filmləri təqdim ediləcəkdir.
Bölmənin digər xəbərləri
