Yaponiyalı seysmoloqlar azərbaycanlı həmkarları ilə əməkdaşlığı davam etdirməkdə maraqlıdırlar
Bakı, 29 iyul (AZƏRTAC). Yaponiyanın “OYO” və “Shinyei Kaisha” şirkətinin nümayəndələri ölkəmizə səfərləri çərçivəsində Azərbaycan Milli Elmlər Akademiyası Respublika Seysmoloji Xidmət Mərkəzinin (RSXM) baş direktoru, geologiya mineralogiya elmlər doktoru Qurban Yetirmişli ilə görüşmüşlər.
Mərkəzin mətbuat xidmətindən AZƏRTAC-a bildirmişlər ki, görüş Azərbaycan və Yaponiya seysmoloqları arasındakı ikitərəfli əməkdaşlıq çərçivəsində reallaşmışdır.
Görüşdə hər iki ölkənin seysmoloqları arasında əməkdaşlığın daha da genişləndirilməsi və təcrübə mübadiləsinin aparılması məsələləri müzakirə edilmişdir.
Rəhbərlik etdiyi mərkəzin yapon şirkətləri ilə əlaqələrindən danışan Q.Yetirmişli birgə layihələrin davam etdiyini bildirmişdir.
“OYO” şirkətinin nümayəndələri Masami Nagase isə öz növbəsində Azərbaycanda seysmologiya ilə bağlı görülən işləri yüksək qiymətləndirərək, yapon seysmoloqlarının RSXM-lə əməkdaşlığı davam etdirməyə maraqlı olduğunu bildirmişdir.
Yaponiyalı qonaqlar, həmçinin RSXM-nin monitorinq mərkəzi ilə də tanış olmuşlar.
Bölmənin digər xəbərləri
