Yaralı hərbçiləri xilas edərkən şəhidlik zirvəsinə ucalan qəhrəman
Astara, 14 oktyabr, İlkin Adıyev, AZƏRTAC
Vətən müharibəsində yalnız əsgərlərimiz və zabitlərimiz deyil, həm də tibb işçilərimiz, həkimlərimiz fədakarlıq və cəsarət nümunəsi göstərdilər. Onlar döyüş meydanında yaralı hərbçiləri xilas etmək üçün ölümü belə gözə alaraq, öz vəzifələrinin öhdəsindən layiqincə gəldilər. Həmin qəhrəmanlardan biri də tibb xidmətinin baş leytenantı Nurlan Əhliman oğlu Fərəməzovdur.
AZƏRTAC-ın bölgə müxbiri xəbər verir ki, Nurlan Fərəməzov 1992-ci il mayın 1-də Astara rayonunun Təngərüd kəndində anadan olub. Uşaqlıqdan elmə və hərbiyə marağı ilə seçilib. Təngərüd kənd tam orta məktəbini bitirdikdən sonra 2009–2015-ci illərdə Azərbaycan Tibb Universitetinin Hərbi tibb fakültəsində təhsil alıb. Hərbi həkim peşəsini yalnız bir iş kimi deyil, həm də insanlara xidmət və Vətənə borc kimi qəbul edib.
Təhsilini başa vurduqdan sonra Azərbaycan Ordusunda xidmətə başlayıb. Nurlan Fərəməzov qısa zamanda peşəkarlığı, məsuliyyəti və cəsarəti ilə seçilib. Döyüş hazırlığında və tibbi təminatda göstərdiyi diqqət onu həm yoldaşlarının, həm də rəhbərliyinin etimadını qazandırıb.
2020-ci ilin payızında Vətən müharibəsi başlayanda o, tərəddüd etmədən ön cəbhəyə yollanıb. Düşmən atəşi altında yaralı əsgərləri xilas edir, döyüş meydanında tibbi yardım göstərirdi. Onu tanıyanların sözlərinə görə, Nurlan sakit təbiətli, qətiyyətli və fədakar idi. Təhlükə olsa belə, düşünmədən başqalarının həyatını qorumağa çalışırdı.
Onun atası Əhliman kişi həm qürur, həm də kədər dolu xatirələrlə o günləri yada salır: “Nurlan uşaqlıqdan sakit, ağıllı, tərbiyəli idi. Hər zaman deyirdi ki, “Ata, mən elə bir iş görməliyəm ki, Vətənə faydam olsun”. Hələ məktəbdə oxuyanda həmyaşıdlarından fərqlənirdi. Sonra Azərbaycan Tibb Universitetinin Hərbi tibb fakültəsinə qəbul olundu. Mənim üçün bu, həm sevinc, həm də məsuliyyət idi — çünki bilirdim, o, həm həkim, həm də hərbçi olacaq. Təhsilini bitirib orduya getdi. Komandirləri onu çox sevirdilər. Deyirdilər, Nurlan həm peşəkar, həm də mərd oğlandır. Müharibə başlayanda zəng edib dedi: “Ata, mən cəbhəyə gedirəm, çünki orada məni gözləyən əsgərlər var. Mən onların həyatını xilas etməliyəm”. Mən bir ata kimi həm qürurlandım, həm də narahat oldum”.
Əhliman kişi deyir ki, o, sonuncu dəfə oğlu ilə müharibənin ilk günlərində danışıb: “Hər dəfə danışanda sakit səslə deyirdi: “Ata, narahat olma, mən yaxşıyam, işimi görürəm”. Mən bilirdim, o, təkcə iş görmür, həyat da xilas edir... Amma bir gün zəng gəlmədi. Sonra xəbər gəldi ki, Nurlan yaralı döyüşçünü çıxararkən şəhid olub. O, həkim idi, amma döyüşçü kimi getdi, əsl igid kimi də şəhid oldu...”.
Nurlan Fərəməzov ağır döyüşlər zamanı yaralı hərbçiləri döyüş meydanından çıxararkən oktyabrın 9-da qəhrəmancasına şəhid olub. Şəhidimiz oktyabrın 10-da doğulduğu kənddə torpağa tapşırılıb.
O, Prezident İlham Əliyevin sərəncamlarına əsasən, ölümündən sonra "Vətən uğrunda", "İgidliyə görə", "Füzulinin azad olunmasına görə", “Cəbrayılın azad olunmasına görə" medalları ilə təltif edilib.
Bölmənin digər xəbərləri
