YENİ AZƏRBAYCAN PARTİYASI QARADAĞ RAYON TƏŞKİLATININ NÖVBƏTİ KONFRANSI KEÇİRİLMİŞDİR
AZƏRTAC xəbər verir ki, iyunun 30-da Yeni Azərbaycan Partiyası Qaradağ rayon təşkilatının növbəti konfransı keçirilmişdir.
Konfransın iştirakçıları əvvəlcə Lökbatan qəsəbəsində Heydər Əliyev parkına gələrək, xalqımızın xilaskar oğlu, müstəqil Azərbaycan dövlətinin memarı və qurucusunun xatirəsini ehtiramla anmış, abidəsi önünə əklil qoymuşlar.
Qaradağ Rayon İcra Hakimiyyətində davam edən tədbirin gündəliyinə təşkilatın əvvəlki konfransından keçən dövrdə fəaliyyəti barədə hesabat və partiyanın IV qurultayına nümayəndələrin seçilməsi məsələləri daxil edilmişdi.
Yeni Azərbaycan Partiyası Qaradağ rayon təşkilatının sədri Aydın Hüseynov məruzəsində bildirmişdir ki, ulu öndər Heydər Əliyevin rəhbərliyi ilə yaradılan partiya müstəqil Azərbaycan dövlətinin ictimai-siyasi, sosial-iqtisadi və mədəni həyatında mühüm rol oynamış, YAP-ın III qurultayında Prezident İlham Əliyevin partiya sədri seçilməsi ilə ölkəmizin həyatında yeni mərhələ başlanmışdır.
Vurğulanmışdır ki, Qaradağ rayon təşkilatı partiyanın proqram vəzifələrinin həyata keçirilməsində, ölkəmizin sosial-iqtisadi inkişafında fəal iştirak edir. Əvvəlki konfransdan ötən müddətdə təşkilatın fəaliyyəti daha da canlanmış, partiya üzvlərinin sayı artaraq 9 min nəfərə çatmışdır. Rayonda 122 ərazi ilk partiya təşkilatı fəaliyyət göstərir.
YAP rayon təşkilatı nəzarət-təftiş qrupunun da hesabatı dinlənilmişdir.
Qaradağ Rayon İcra Hakimiyyətinin başçısı Hüseyn İsrafilov, Yeni Azərbaycan Partiyası idarə heyətinin üzvü, professor Şahlar Əsgərov ölkəmizdə ən güclü siyasi qüvvəyə çevrilən YAP-ın Azərbaycan dövlətçiliyi qarşısındakı tarixi rolundan danışmış, qazanılan uğurlarda partiyanın yaradıcısı, ümummilli liderimiz Heydər Əliyevin əvəzsiz xidmətlərini xüsusi vurğulamışlar.
Bildirilmişdir ki, ulu öndər Heydər Əliyevin xalqımızın təkidli tələbi ilə hakimiyyətə qayıdışı müstəqil dövlətçiliyimizi anarxiyadan, parçalanmaq və məhv olmaq təhlükəsindən, iqtisadi tənəzzüldən, beynəlxalq təcriddən xilas etmişdir. Ümummilli liderin işləyib hazırladığı müstəqil dövlət quruculuğu konsepsiyası müasir Azərbaycan dövlətinin uğurlarının bünövrəsində dayanaraq gələcək inkişafın əsasını qoymuşdur. Hazırda Azərbaycanın dünyada bənzəri olmayan sürətlə inkişaf etdiyini vurğulayan natiqlər həmin siyasətin bu gün Prezident İlham Əliyev tərəfindən böyük uğurla davam etdirildiyini diqqətə çatdırmışlar.
Qarşıdakı prezident seçkilərinə hazırlıq işlərinə toxunan natiqlər, son 5 ildə ölkədə aparılan nəhəng quruculuq işlərinin canlı şahidi olmuş seçicilərin yalnız bir namizədə - Heydər Əliyev ideyalarının ən layiqli davamçısı İlham Əliyevə səs verəcəklərinə heç kimin şübhəsi olmadığını qeyd etmişlər. Çünki bu gün Azərbaycanın bütün dünya tərəfindən etiraf olunan dinamik inkişafı ilk növbədə vətəndaşlarımızın maddi rifah halının yaxşılaşmasına xidmət edir, paytaxtla bərabər, regionlar da sürətli tərəqqi yolunda inamla irəliləyir.
Yeni Azərbaycan Partiyasının növbəti qurultayına nümayəndələr seçilmişdir.
Konfrans iştirakçıları adından Prezident İlham Əliyevə müraciət qəbul olunmuşdur.
Bölmənin digər xəbərləri
