YENİ AZƏRBAYCAN PARTİYASINDA MƏTBUAT KONFRANSI
Ümummilli lider Heydər Əliyevin su təsərrüfatı və meliorasiya sisteminə daim diqqət və qayğı ilə yanaşdığını vurğulayan Ə.Əhmədzadə demişdir ki, bu siyasət Prezident İlham Əliyev tərəfindən uğurla davam etdirilir. Son illər dövlət büdcəsindən ayrılan vəsaitin həcminin bir neçə dəfə artırılması ölkəmizdə qeyri-neft sektorunda xüsusi çəkiyə malik kənd təsərrüfatının inkişafına göstərilən diqqətin bariz göstəricisidir.
Azərbaycanda becərilən torpağın 90 faizinin suvarılan əraziləri əhatə etdiyini bildirən natiqin sözlərinə görə, bu sahələrdə meliorasiya işlərini və suvarma sistemini yaxşılaşdırmaq üçün ciddi tədbirlər görülür. Ermənistan hərbi qüvvələri tərəfindən işğal edilən Azərbaycan torpaqlarında suvarılan 130 min hektar sahə dövlətimizin nəzarətində deyildir. Qoşunların təmas xəttində yerləşən 30-40 min hektar sahənin becərilməsində də müəyyən problemlər mövcuddur.
Ölkəmizdə istehsal olunan kənd təsərrüfatı məhsullarının, əsasən, suvarılan torpaqların payına düşdüyünü bildirən natiq söyləmişdir ki, Azərbaycanda meliorasiya işlərinin və su təchizatının daha da yaxşılaşdırılması üçün geniş imkanlar mövcuddur. Belə ki, ölkə ərazisindəki mövcud 189 ədəd su anbarına 21 milyard kubmetr su toplamaq mümkündür. 50 min kilometr suvarma kanalı, 30 min kilometr su kollektor sistemi, 812 nasos stansiyası, 6500 ədəd artezian quyusu, 129 min ədəd hidrotexniki qurğu, 679 kilovat gücündə aqreqatlar fəaliyyət göstərir.
Su təsərrüfatı və meliorasiya sisteminin istismarının dövlət büdcəsindən ayrılan vəsait hesabına idarə olunduğunu xatırladan sədr diqqətə çatdırmışdır ki, torpaqların suvarılmasına ayrılan suyun 1000 kubmetri 50 qəpiyə satılır. Suya qoyulan qiymət simvolik xarakterlidir və israfçılığın qarşısını almaq üçün tətbiq edilmişdir. 2006-cı ildə ayrılacaq dövlət vəsaitinin həcmi 65 milyon manat (AZN) nəzərdə tutulmuşdur. Su satışından yığılacaq pulun həcmi isə 1,5 milyon manat civarında olacaqdır.
Sel sularının yarada biləcəyi təhlükələri aradan qaldırmaq, daşqınların qarşısını almaq üçün bütün imkanlardan istifadə edildiyini deyən Ə.Əhmədzadə bildirmişdir ki, cari ilin yanvar-aprel aylarında 147 kilometr uzunluğunda sahəni əhatə edən bəndlərdə bərkidilmə işləri aparılmışdır. Son illər alınan 100-ə yaxın yeni texnika bu işlərin vaxtında görülməsinə və risklərin azalmasına geniş imkanlar yaradır.
Sonda jurnalistləri maraqlandıran suallar cavablandırılmışdır.
Bölmənin digər xəbərləri
