Yeni illə əlaqədar AHİK tərəfindən 4500 ailəyə ərzaq yardımı nəzərdə tutulub
Bakı, 23 dekabr, Səlim Rəhimzadə, AZƏRTAC
Azərbaycan Həmkarlar İttifaqları Konfederasiyası (AHİK) hər il bütün bayramlarda şəhid ailələrinə və aztəminatlı ailələrin bir qisminə pul vəsaiti, bir qisminə ərzaq yardımı göstərir. Biz 7 ilə yaxındır bayramlarda Azərbaycanın 76 şəhər və rayonunda yaşayan adıçəkilən ailələrə ərzaq yardımı göstəririk. Üç ay əvvəl 6500 ailəyə yardım göstərilib. Dekabrın 28-də ərzaqla dolu avtomobil karvanını yola salacağıq.
AZƏRTAC xəbər verir ki, bu fikirləri Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Möhbalıyev jurnalistlərə açıqlamasında deyib.
AHİK sədri qeyd edib ki, maşın karvanı vasitəsilə 4500 ailəyə ərzaq yardımı nəzərdə tutulub. Eyni zamanda, Naxçıvanda yaşayan şəhid ailələrinin və aztəminatlı ailələrin 1000 üzvünə də yardım olunacaq. “Konfederasiyamız, eyni zamanda, 20 Yanvar və Birinci Qarabağ müharibəsi şəhidlərinin ailələrinin də bir qismini himayəyə götürüb. İndi də 400-ə yaxın şəhid övladına kömək edirik. Uşaqların 18 yaşınadək hər ay maliyyə yardımı göstərilir. Vətənimizin bütövlüyü uğrunda canını fəda etmiş şəhidlərin övladlarına yardım etmək borcumuzdur. AHİK hər il iki mindən çox şəhid ailəsini ödənişsiz olaraq istirahətə göndərir. Şəhid ailələrinin məşğulluğunun təmin edilməsi istiqamətində də işlər görülür. Eyni zamanda, Qarabağ Dirçəliş Fonduna və “YAŞAT” Fonduna ianələr edirik. Qazilərimizin tezliklə öz sağlamlıqlarına qovuşmaları üçün imkanımız çatdığı qədər yardım göstəririk”.
Bölmənin digər xəbərləri
