Yohann Vadeful: Livanın cənubunda Avropa İttifaqının missiyası yerləşdirilsin
Qahirə, 17 iyul, AZƏRTAC
Almaniyanın xarici işlər naziri Yohann Vadeful BMT-nin Livanın cənubundakı Müvəqqəti Qüvvələrinin (UNIFIL) mandatı başa çatdıqdan sonra təhlükəsizlik boşluğunun yaranmasının qarşısını almaq məqsədilə bölgədə Avropa İttifaqının missiyasının yerləşdirilməsi təşəbbüsü ilə çıxış edib.
AZƏRTAC “əl-Hədəs” telekanalına istinadla xəbər verir ki, təşəbbüsə görə, UNIFIL-in fəaliyyətinin başa çatmasından sonra Livanın cənubunda təhlükəsizlik baxımından boşluğun yaranmaması üçün Aİ mandatı məsələsi müzakirə olunmalıdır. Qeyd olunur ki, bu addım İsrail ordusunun sərhəd bölgələrindən çıxması üçün şərait yarada və bölgədə təhlükəsizlik mexanizmlərinin qorunmasına töhfə verə bilər.
Bununla yanaşı, İsrail KİV-lərinin məlumatına əsasən, Livanın cənubunda təhlükəsizlik razılaşmalarının icrasına nəzarət etmək məqsədilə bölgədə İtaliya hərbi qüvvələrinin yerləşdirilməsi ilə bağlı paralel təklif də müzakirə olunur.
Bölmənin digər xəbərləri
