“Yuğ” teatrı “Şəbədə”ni yenidən göstərəcək
Bakı, 19 aprel, AZƏRTAC
Aprelin 23-də Azərbaycan Dövlət “Yuğ” Teatrı “Şəbədə” tamaşasını növbəti dəfə nümayiş etdirəcək.
Teatrdan AZƏRTAC-a bildirilib ki, böyük mütəfəkkir, milli dramaturgiyamızın banisi Mirzə Fətəli Axundzadənin “Mürafiə vəkillərinin hekayəti” (1855) pyesi əsasında hazırlanan birhissəli səhnə əsərinə rejissor Gümrah Ömər quruluş verib. Tamaşanın quruluşçu rəssamı Umay Həsənova, rejissor assistenti Məryəm Qələndərlidir. Rolları Xalq artisti Vidadi Həsənova (Ağa Mərdan), aktyorlar Elgün Həmidov (Ağa Salman), Vüqar Hacıyev (Ağa Abbas, Hacı Rəcəbəli), Amid Qasımov (Ağa Kərim), Elçin Əmirov (Əziz bəy), Mətanət Abbas (Zübeydə), Ləman Mərrih (Səkinə) və Günəş Mehdizadə (Zeynəb) canlandıracaqlar.
“Mənəviyyatın çözə bilmədiyini heç bir ədalət məhkəməsi çözə bilməz!” ideyalı səhnə işi xurafat və geriliyin bütün zaman və məkanlarda mütərəqqi dəyərlərə zərbə olduğunu bəyan edir.
Səhnə əsəri A. Şaiq adına Azərbaycan Dövlət Kukla Teatrda təqdim olunacaq.
Bölmənin digər xəbərləri
