ZAHİD QARALOV: “BƏLƏDİYYƏLƏR MÜSTƏQİL QURUM OLMALIDIR”
Bəzi beynəlxalq təşkilatlar Azərbaycanda bələdiyyələrin dövlət qurumlarına çevrilməsini təklif edirlər.
Məsələyə münasibət bildirən Milli Məclisin regional məsələlər daimi komissiyasının sədri Zahid Qaralov AZƏRTAC-ın müxbirinə demişdir ki, Avropa Şurasının Regional Məsələlər Komitəsinin və digər beynəlxalq qurumların bu təklifini Azərbaycan qəbul etməmişdir. Ona görə ki, Sovetlər Birliyi dövründə bələdiyyələrə oxşar qurumlar var idi və biz onların dövlət orqanları kimi fəaliyyətlərini görmüşük. 1995-ci ildə qəbul etdiyimiz Konstitusiyada təsbit olunduğu kimi, bələdiyyələr müstəqil qurum olmalı və qeyri-dövlət strukturu kimi fəaliyyət göstərməlidir. Bələdiyyələrin statusu, fəaliyyətinin tənzimlənməsi və digər fəaliyyət növlərini nizamlamaq üçün müxtəlif qanunlar qəbul olunub. Bələdiyyələrin həmin qanunlar çərçivəsində fəaliyyətləri daha çox səmərə verə bilər. Amma bu heç də o demək deyil ki, bələdiyyələrə nəzarət yoxdur. Hər yerdə olduğu kimi, Azərbaycanda da yerli özünü-idarə orqanlarına dövlət nəzarəti vardır.
Bölmənin digər xəbərləri
