İDMAN
ZAQATALANIN GƏNC CÜDOÇULARI BÖYÜK UĞUR QAZANMIŞLAR
Zaqatalanın idman həyatında əlamətdar hadisə baş vermişdir. Türkiyənin Antaliya şəhərində yeniyetmələr arasında keçirilmiş Dünya Kuboku uğrunda yarışlarda rayonun gənc cüdoçuları Orxan Acırqayev və Rəşid Məmmədov uğur qazanmışlar. 15 ölkənin qatıldığı mötəbər yarışda hər iki idmançı finalda uduzaraq fəxri 2-ci yerə layiq görülmüş və Vətənə gümüş medallarla qayıtmışlar. İdmançıları bu məsul yarışa məşqçilər Arif Ramazanov və Əfqan Rzayev hazırlamışlar.
Rayon icra hakimiyyətindən AZƏRTAC-ın müxbirinə bildirmişlər ki, şəhər mədəniyyət evində qalib idmançılar və onların məşqçiləri ilə ictimaiyyət nümayəndələrinin, idarə və müəssisə kollektivlərinin görüşü keçirilmişdir.
Görüşdə O.Acırqayev və R.Məmmədov çıxış edərək idmançılara göstərilən diqqət və qayğıya görə ölkəmizin Prezidenti İlham Əliyevə öz minnətdarlıqlarını bildirmişlər. Onlar eyni zamanda, bu beynəlxalq yarışda iştirak etmələrinə şərait yaratdığına görə rayon rəhbərliyinə də təşəkkür etmişlər.
Axırda hər iki idmançıya qiymətli hədiyyələr və fəxri fərmanlar, pul mükafatları təqdim olunmuşdur.
Görüş konsert proqramı ilə başa çatmışdır.