ZƏRDABLI HEYVANDARLAR İLİ UĞURLA BAŞA VURMUŞLAR
Ağsu, 18 yanvar (AZƏRTAC). Rayonda təsərrüfatın aparıcı sahələrindən olan heyvandarlıq sürətlə inkişaf etdirilir. Hazırda burada 51 min 450 baş iribuynuzlu mal-qara, 103 min baş davar vardır. Quşların sayı isə 170 min başa çatmışdır. Rayon statistika idarəsinin məlumatına görə, 2008-ci illə müqayisədə ötən il mal-qaranın sayı 592 baş, qoyun-keçilərin sayı 1.545 baş, quşların sayı isə 503 baş artmışdır. Zərdablı fermerlər məhsul istehsalında da uğurlu nəticələr qazanmışlar. Belə ki, 2008-ci ilə nisbətən ötən il ət istehsalı 39,4 ton artaraq 2.931 tona, süd istehsalı 58,1 ton artaraq 21 min 663 tona, yumurta istehsalı isə 28 min ədəd çoxalaraq 7.734 min ədədə çatmışdır.
Qeyd edək ki, rayonda heyvandarlığın intensiv inkişafını təmin etmək məqsədilə mal-qaranın cins tərkibinin yaxşılaşdırılması, yem bitkiləri əkini sahələrinin genişləndirilməsi məqsədilə ciddi tədbirlər həyata keçirilir. Təkcə keçən il 553 baş damazlıq qaramal və düyələrdə süni mayalandırma həyata keçirilmişdir. Hələlik onlardan 224 baş cins bala alınmışdır.
2009-cu ildə 2.491 hektarda yeni yonca sahələri salınmışdır. Rayonda heyvandarlığın inkişafı sahəsində tədbirlər davam etdirilir.
Bölmənin digər xəbərləri
