İQTİSADİYYAT


Azərbaycan Kənd Təsərrüfatı üzrə Təlim və İnkişaf Mərkəzinin təqdimatı olub YENİLƏNİB

Bakı, 20 dekabr, Elvira Məmmədova, AZƏRTAC

Dekabrın 20-də Bakıda Azərbaycan Kənd Təsərrüfatı üzrə Təlim və İnkişaf Mərkəzinin (“AqroMərkəz”) təqdimatı olub.

AZƏRTAC xəbər verir ki, “AqroMərkəz”in təqdimatına və “Azərbaycanda kənd təsərrüfatı: imkanlar, problemlər və perspektivlər” mövzusuna həsr olunan tədbirdə dövlət rəsmiləri, Kənd Təsərrüfatı Nazirliyinin, BMT-nin Ərzaq və Kənd Təsərrüfatı Təşkilatının (FAO) nümayəndələri iştirak ediblər.

Əvvəlcə “AqroMərkəz”in il ərzindəki fəaliyyətini əks etdirən videoçarx nümayiş olunub.

Tədbirdə çıxış edən Prezidentin aqrar siyasət məsələləri üzrə köməkçisi-şöbə müdiri Azər Əmiraslanov ölkəmizdə aqrar sahənin inkişafı ilə bağlı görülən işlər, qarşıda duran vəzifələr barədə məlumat verib. Dövlət məmurları, alim və mütəxəssislər üçün yaradılan platformanın əhəmiyyətinə, Azərbaycanda kənd təsərrüfatı məsələləri ilə bağlı mühüm dialoqu şərtləndirən amillərə toxunan Azər Əmiraslanov deyib: “Həm dövlətin, həm də vətəndaşlarımızın kənd təsərrüfatından böyük gözləntiləri var. Prezident İlham Əliyev tərəfindən bu gün aqrar sahənin inkişafı dövlət siyasətinin ən mühüm prioritetlərindən biri kimi müəyyən olunub. Digər sahələrdə olduğu kimi, kənd təsərrüfatında da sosial tərəfdaşlıq münasibətlərinin qurulması (bir tərəfdən dövlət, bir tərəfdən biznes, özəl sektor, beynəlxalq təşkilatlar, eyni zamanda, qeyri-hökumət təşkilatları) olduqca vacibdir. Hesab edirəm ki, “AqroMərkəz” məhz bu missiyanı üzərinə götürə biləcək və uğurlu platforma rolunu oynayacaq. Bu gün kənd təsərrüfatının prioritet istiqamət kimi elan olunduğu bir vaxtda ekspert cəmiyyətinin formalaşdırılmasına çox böyük ehtiyac var. Hazırda digər sahələrdə ekspert cəmiyyətləri formalaşıb. Biz istəyirik ki, kənd təsərrüfatında da professional, məsələlərə peşəkar yanaşan ekspert qurumu formalaşsın. İnanıram ki, “AqroMərkəz” həm də bu mandatı daşıyacaq, öz təhlilini, tədqiqatlarının nəticələrini cəmiyyətə təqdim edəcək. Aqrar təhsil, aqrar elm, aqrar tədqiqatlar informasiya məsləhət xidmətləri arasında da əlaqələr qurulmalıdır və yəqin ki, “AqroMərkəz”in fəaliyyətinin əsas istiqamətlərdən biri də məhz bu olacaq. Etiraf etmək lazımdır ki, biz aqrar təhsil, aqrar elm, aqrar siyasət, istehsalat, təsərrüfat arasında əlaqə və əks-əlaqəni heç də həmişə lazımınca təmin edə bilmirik. Hesab edirik ki, “AqroMərkəz” bu problemin həllinə öz töhfəsini verə bilər”.

Azər Əmiraslanov bildirib ki, kənd təsərrüfatı iqtisadiyyatın davamlı, dayanıqlı inkişafının əsas, çox mühüm şərtidir və eyni zamanda, sinerji verən, sistem yaradan və formalaşdıran bir sahədir. Digər tərəfdən ərzaq təhlükəsizliyi məhz kənd təsərrüfatının inkişafından asılıdır. “Bu gün əhalinin yarısı kənddə yaşayır və bu o deməkdir ki, kənd təsərrüfatının inkişafı həm də sosial sabitliyin, kənd əhalisinin həyat səviyyəsinin yüksəldilməsinin əsas şərtidir. Məşğul əhalinin təxminən 38 faizi kənd təsərrüfatı sektorunda çalışır. Bu baxımdan aqrar sahənin inkişafı, həm də iş yerlərinin açılması deməkdir. BMT-nin hesablamalarına görə, kənd təsərrüfatı yeganə sahədir ki, yoxsulluğun azaldılmasına daha çox təsir göstərir. Digər sahələrlə müqayisədə onun təsir effekti 4 dəfə çoxdur”, - deyə Prezidentin köməkçisi vurğulayıb.

Aqrar sektorun regionların inkişafındakı mühüm rolundan danışan Azər Əmiraslanov qeyd edib ki, hazırda ölkənin kənd təsərrüfatında çox böyük resurslar, istifadə olunmamış imkanlar mövcuddur. Bu imkanların, ehtiyatların üzə çıxarılması üçün çox iş görülməlidir. Yaradılan “AqroMərkəz” də bu missiyanı yerinə yetirə bilər. Yeni dövrdə, xüsusilə də qlobal böhran şəraitində digər sahələrlə müqayisədə kənd təsərrüfatının investisiya baxımından daha cəlbedici olduğunu bildirən Prezidentin köməkçisi deyib: “Digər sahələrdə istehsal olunan məhsullara tələbat azaldığı halda, ərzaq məhsullarına tələbat heç vaxt kəskin şəkildə azalmır və bu da məhz kənd təsərrüfatını digər sahələrlə müqayisədə daha cəlbedici edir. Kənd təsərrüfatı canlı orqanizm və riskli sahədir. Odur ki, dövlət bu sahəni daim dəstəkləyir. Aqrar sığorta sisteminin qurulması da xüsusilə aktualdır. Kənd təsərrüfatı iki mühüm sütun üzərində inkişaf edir: heyvandarlıq və bitkiçilik. Bu sahələrin effektivliyi və səmərəliliyi onların bir-biri ilə düzgün uzlaşdırılmasından asılıdır”.

Azər Əmiraslanov çıxışında torpaqdan səmərəli istifadə, kənd təsərrüfatına dövlət dəstəyinin səmərəli təşkili, effektiv, davamlı və dayanıqlı inkişaf, məhsuldarlıq, maraqların uzlaşdırılması, ixtisaslaşma, sahənin inkişafında elmi yanaşma kimi amillərə də toxunub. Diqqətə çatdırılıb ki, qida təhlükəsizliyinin təmin edilməsi ilə bağlı dövlətimizin başçısı tərəfindən ciddi institusional addımlar atılır və bununla bağlı Qida Təhlükəsizliyi Agentliyi yaradılıb. “AqroMərkəz” də öz fəaliyyətində bu prinsipləri diqqətdə saxlamalıdır.

Tədbirdə çıxış edən nazir müavini Seyfəddin Talıbov son dövrlər aqrar sahədə baş verən köklü dəyişikliklərdən, aparılan institusional islahatlardan danışıb, “Elektron Kənd Təsərrüfatı” İnformasiya Sisteminin yaradılması, aqrar sahədə ən müasir, mütərəqqi metodların tətbiq edilməsi, texnika parkının yenilənməsi, heyvanların cins tərkibinin yaxşılaşdırılması, kadr hazırlığı, həmçinin Strateji Yol Xəritəsində qarşıya qoyulmuş hədəflər barədə ətraflı məlumat verib.

Nazir müavini Azərbaycan Kənd Təsərrüfatı üzrə Təlim və İnkişaf Mərkəzinə fəaliyyətində uğurlar diləyib və mərkəzin kənd təsərrüfatının inkişafına öz töhfəsini verəcəyini bildirib.

Azərbaycan Dövlət Aqrar Universitetinin rektoru İbrahim Cəfərov isə aqrar təhsilə dövlət dəstəyindən, universitetin maddi-texniki bazasının əsaslı şəkildə yenidən qurulmasından, laboratoriyaların ən müasir avadanlıqlarla təchiz edilməsindən, müasir tələbə yataqxanalarının istifadəyə verilməsindən, həmçinin beynəlxalq təşkilatlar tərəfindən göstərilən dəstək tədbirlərindən söz açıb.

“AqroMərkəz”in icraçı direktoru Pavel Belorusski, FAO ofisinin rəhbəri Mələk Çakmak Azərbaycanda aqrar sahənin inkişafı ilə bağlı görülən işlərdən, əldə olunan nailiyyətlərdən danışıblar.

Bildirilib ki, Azərbaycan Kənd Təsərrüfatı üzrə Təlim və İnkişaf Mərkəzi ölkəmizin kənd təsərrüfatı sahəsində peşəkar mütəxəssislərə tələbatını ödəmək məqsədilə 2017-ci ildə yaradılıb. “AqroMərkəz” üç istiqamət - təhsil və təlim, tədqiqat və inkişaf, kənd təsərrüfatı sahəsində yeni müəssisələrin yaradılması istiqamətində fəaliyyət göstərəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.