Kənd Təsərrüfatı Nazirliyi "AMAL" layihəsini təqdim edib YENİLƏNİB VİDEO
Bakı, 30 oktyabr, Ramiz Quliyev, AZƏRTAC
Oktyabrın 30-da Bakıda Kənd Təsərrüfatı Nazirliyinin “AMAL” adlı yeni layihəsinin təqdimat mərasimi keçirilib.
AZƏRTAC xəbər verir ki, layihə çərçivəsində Gənc Fermerlər Proqramı və Kənd Təsərrüfatı Sahəsində Peşə Təhsili Proqramı həyata keçirilməklə, gənclərin məşğulluq imkanlarının artırılması üçün zəruri olan bilik və bacarıqlara sahib olması, texnoloji yeniliklərin tətbiq edilməsi ilə bağlı müvafiq təlimlərin keçirilməsi nəzərdə tutulub.
Tədbirdə çıxış edən kənd təsərrüfatı nazirinin müavini İlhamə Qədimova ölkəmizdə kənd təsərrüfatının inkişafı istiqamətində aparılan məqsədyönlü islahatlardan, gənclərin aqrar sektorda məşğulluğu ilə bağlı dövlətimiz tərəfindən görülən işlərdən söz açıb.
Onun sözlərinə görə, ölkədə fəal əhalinin təqribən 35-36 faizi məhz aqrar sektorda fəaliyyət göstərir. Bu sahədə rəqabətqabiliyyətli mühitin yaradılması, fermerlərə müvafiq
dövlət dəstəyinin təbliğ edilməsi, regionlarda yeni iş yerlərinin yaradılması da, kənd təsərrüfatı sahəsinin əsas prioritet istiqamətlərindən birinə çevrilib.
Nazir müavini bildirib ki, layihə ölkədə gənclər siyasətinin daha səmərəli həyata keçirilməsinə töhfə verəcək, cəmiyyətin bütün sahələrində olduğu kimi aqrar sektorda da onların iştirak səviyyəsini artıracaq, yeni nəsil fermerlərin formalaşmasına yol açacaq, yaradıcı və innovativ potensialın üzə çıxarılmasına şərait yaradacaq, gənclərin təhsil və məşğulluq məsələlərinə diqqəti artıracaq, eləcə də, aqrar sektorda müasir informasiya-kommunikasiya texnologiyalarından səmərəli istifadəni təşviq edəcək.
BMT-nin Ərzaq və Kənd Təsərrüfatının (FAO) Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak qeyd edib ki, “AMAL “ layihəsi Azərbaycan hökumətinin ölkə iqtisadiyyatının şaxələndirilməsinə verdiyi önəmin bariz nümunəsidir. Layihə FAO -Azərbaycan tərəfdaşlıq proqramına uyğun olmaqla, kənd təsərrüfatının inkişafını təşviq edir.
FAO rəsmisi bu layihənin əsas məqsədlərindən birinin də Azərbaycanda “yaşıl iş yerləri”nin yaradılması olduğunu söyləyib.
Əmək və əhalinin sosial müdafiəsi nazirinin müavini İdris İsayev bildirib ki, əhalinin məşğulluğu sahəsində respublikada ciddi tədbirlər həyata keçirilib. Bu sahədə dayanıqlı inkişafa nail olunub, iqtisadiyyatın diversifikasiyası həyata keçirilib, yeni infrastruktur layihələri reallaşdırılıb. Nəticə etibarı ilə yoxsulluğun və işsizliyin səviyyəsi aşağı enib. Gənclərin məşğulluğunun təmin edilməsi dövlət tərəfindən prioritet vəzifə kimi qarşıya qoyulub və xüsusi proqramlar icra olunub.
Onun sözlərinə görə, bu proqramlara 2018-ci ildə təqribən 36 milyon manat sərf ediləcək və artıq 7800 şəxs həmin proqrama cəlb olunub. Eyni zamanda, 6530 şəxs öz biznes planlarını təsdiq edib ki, onun da 70 faizi aqrar sahə ilə bağlıdır. Növbəti ildə də bu proqramların icrasına əlavə vəsait nəzərdə tutulub.
Gənclər və idman nazirinin müavini Fərhad Hacıyev gənclərin aqrar sahəyə daha çox cəlb edilməsinin vacibliyini qeyd edib. Nəzərə çatdırıb ki, indiki dövrdə gəncləri bu sahədə maarifləndirmək də zəruri şərtlərdən biridir.
Nazir müavini Prezident İlham Əliyev tərəfindən Azərbaycan gəncliyi ilə bağlı Dövlət Proqramının imzalandığını və orada məşğulluğun xüsusi bir bölüm olduğunu diqqətə çatdırıb. Bu baxımdan Gənclər və İdman Nazirliyi tərəfindən də gənclərin bilik və bacarıqlarının inkişafı, sahibkarlıq və məşğulluq imkanlarının artırılması, həmçinin əmək bazarı və məşğulluq haqqında məlumatlılıq səviyyəsinin artırılması sahəsində məqsədyönlü tədbir görülür.
F.Hacıyev Kənd Təsərrüfatı Nazirliyi və FAO-nun Gənclər və İdman Nazirliyinin bu sahədəki imkanlarından yararlanmasını tövsiyə edib.
Azərbaycan Respublikasının Prezidenti yanında Gənclər Fondunun icraçı direktoru Fərid Cəfərov vurğulayıb ki, sözügedən layihədən ən çox faydalanan gənclərimiz olacaq.
Bildirilib ki, ölkə əhalisinin təqribən 30 faizini gənclər təşkil edir. Gənclər Fondunun da əsas məqsədi gənclərin sosial-iqtisadi və elmi potensialının artırılmasına yönəlmiş layihələrinin dəstəklənməsidir. “2011-ci ildə yaradılmış Gənclər Fondu 6 il müddətində 4 minə yaxın gənclər və gənclər təşkilatları tərəfindən daxil olmuş layihələri maliyyələşdirib. Bu layihələr sırasında kənd təsərrüfatının təşviq olunması, sahibkarlığın inkişafı ilə bağlı maarifləndirmə tədbirləri və gənclərimizin bilik və bacarıqlarının artırılmasına hesablanmış treninqlər də olub”.
F.Cəfərov Gənclər Fondunun qarşısında qoyulan vəzifələrin bir qədər də genişləndirildiyini söyləyib. Buraya, həmçinin gənclərin xaricdə təhsilinin maliyyələşdirilməsi, beynəlxalq təşkilatlarda təcrübə keçməsi daxildir. Digər məqam isə gənclərin məşğulluq proqramıdır. Bu da iş təcrübəsi olmayan və ya iş tapmaqda çətinlik çəkən gənclərə dəstək göstərməkdən ibarətdir. 2019-cu ildən başlanılacaq yeni bir layihəyə əsasən isə, gənclərə Gənclər Fondu tərəfindən güzəştli kiçikhəcmli kreditlər veriləcək.
Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin rəisi Mirzə Əliyev bildirib ki, “AMAL” layihəsi ilə bağlı bir neçə donor təşkilatlarla danışıqlara başlanılıb və artıq FAO ilə razılığa gəlinib.
M.Əliyev deyib ki, layihənin əsas məqsədlərindən biri gəncləri aqrar sahəyə cəlb etməklə, onların rifah halının yaxşılaşdırılmasıdır: “Bu gün kənd təsərrüfatında innovasiya məsələsi, “yaşıl texnologiya”ya söykənən dəyər zəncirinin inkişaf etdirilməsi, gələcəyin fermerlərini formalaşdırmaq, aqrar sahədə peşə təhsilini inkişaf etdirmək, kənd yerlərində yaşayan gənclərin ətraf mühitə yanaşma tərzini dəyişmək və sahibkarlar kütləsini formalaşdırmaq qarşımızda duran prioritet istiqamətlərdir. Nəticə etibarilə əsas məqsəd ölkədə ərzaq təhlükəsizliyinin təmin edilməsidir”.
Xidmət rəisi vurğulayıb ki, layihəyə əsasən, gənclərlə maarifləndirici aksiyalar keçiriləcək. İlkin mərhələdə AMAL.gov.az saytı istifadəyə verilib. Daha sonra şəffaf seçim komitəsi yaradılacaq. Gənclərin resurslara çıxış imkanları araşdırılacaq. Onlara bütün sahələrdə dəstək veriləcək.
Bölmənin digər xəbərləri
