“Professor Rövşən Mustafayev ”adına medal və sertifikatın təqdimetmə mərasimi keçirilib VİDEO
Bakı, 21 dekabr, AZƏRTAC
Dekabrın 21-də Azərbaycan Milli Elmlər Akademiyasının (AMEA) Hüquq və İnsan Haqları İnstitutunda “Professor Rövşən Mustafayev ”adına medal və sertifikatın təqdimetmə mərasimi keçirilib.
AZƏRTAC xəbər verir ki, mərasimdə institutun direktoru, Milli Məclisin deputatı Aytən Mustafayeva Azərbaycan Prezidenti İlham Əliyevin elmə daim xüsusi önəm verdiyini vurğulayıb. Rəhbərlik etdiyi institutda aparılan elmi araşdırmalardan danışan direktor qeyd edib ki, “Professor Rövşən Mustafayev ”adına medal və sertifikat işğalçı, qəsbkar erməni məsələsi üzrə elmi-tədqiqatların aparılması və təkzibolunmaz elmi faktların tapılmasında fəal, səmərəli fəaliyyəti ilə seçilən alimlərə, tədqiqatçılara təqdim olunur. A.Mustafayeva 2018-ci ildə bu mükafata Hüquq və İnsan Haqları İnstitutunun beynəlxalq hüquq şöbəsinin müdiri, hüquq üzrə elmlər doktoru Ramin Qurbanovun və tədqiqatçı Şəlalə Həsənovanın layiq görüldüklərini diqqətə çatdırıb. Qeyd olunub ki, R.Qurbanova bu mükafat bir sıra ölkələrin elmi-tədqiqat mərkəzlərində hüququn müxtəlif sahələrinə dair elmi araşdırmalarına, Azərbaycan Respublikasının məhkəmə sistemi üçün “Elektron məhkəmə” və “Elektron icra” kimi əhəmiyyətli sistemlərin yaradılmasına, Avropa Şurasının alimləri ilə birgə hazırlanan bir sıra elmi nəşrlərə, ölkəmizi beynəlxalq aləmdə layiqincə təmsil etməsinə, Azərbaycan ilə Avropa Şurası arasında qarşılıqlı münasibətlərə öz tarixi töhfəsini verməsinə və bu sahədə əldə etdiyi nailiyyətlərə görə verilib. Ş.Həsənova isə bu mükafatı Qarabağ həqiqətlərinin dünyaya düzgün şəkildə çatdırılmasında, Qafqaz regionuna gəlmə olan ermənilərin burada hər şeyi saxtalaşdırmağa, qədimləşdirməyə və özününküləşdirməyə çalışmaları istiqamətində cinayətkar fəaliyyətlərinin ifşa edilməsində, cinayətkar erməni obrazının açılmasında, Ermənistanın beynəlxalq hüquq norma və prinsiplərinə əməl etməyən təcavüzkar dövlət olması faktının təkzibolunmaz materiallarla sübuta yetirilməsində göstərdiyi xidmətlərə, ermənilər tərəfindən törədilən soyqırımları ilə bağlı sənədli filmlərinə görə qazanıb.
Sonra mükafat sahiblərinə təqdim olunub.
Xatırladaq ki, bu mükafat Hüquq və İnsan Haqları İnstitutu və professor Rövşən Mustafayev adına Beynəlxalq Fond tərəfindən təsis edilib.
Qeyd edək ki, professor Rövşən Mustafayev respublikada ilk siyasi elmlər doktoru olmaqla yanaşı, 1993-cü ildə ilk dəfə ölkədə yaradılan qeyri-hökumət elmi-tədqiqat intellektual mərkəzin - Azərbaycan Dövlət Quruculuğu və Beynəlxalq Münasibətlər İnstitutunun yaradıcısı və direktoru, 1998-ci ildə Azərbaycan Respublikası Prezidentinin Sərəncamı ilə yaradılan İnsan Hüquqları üzrə Elmi-Tədqiqat İnstitutunun təşkilatçısı və ilk direktoru olub. O, Azərbaycanda Ombudsman təsisatının yaradılması layihəsinin rəhbəri, “Dirçəliş-XXI əsr” və “Vozrojdenie-XXI vek” jurnallarının yaradıcısı və baş redaktoru kimi fəaliyyət göstərib.
Bölmənin digər xəbərləri
