REGİONLAR
Salyanda istixanalarda bol məhsul yetişib - karantin rejiminin yumşaldılması bazarın da canlanmasına səbəb olacaq VİDEO
Salyan, 18 may, İsmayıl Cəfərli, AZƏRTAC
Son illər Salyanda istixana şəraitində yetişdirilən xiyar-pomidor və digər bitkilərin əkininə maraq artıb. Dövlətin yaratdığı əlverişli şəraitdən yararlanan salyanlı fermerlər bu il daxili və xarici bazarlara tonlarla məhsul çıxarmaqla, ölkəmizə daha çox valyuta gətirmək niyyətindədirlər. Rayonda demək olar ki, daha çox ailə təsərrüfatları hesabına 500-ə yaxın istixana mövcuddur.
AZƏRTAC xəbər verir ki, hazırda Salyanın əksər kəndlərində ailə təsərrüfatlarında istixana şəraitində pomidor becərilir. Rayonun Qarabağlı kəndində hər bir şəxsi təsərrüfatda pomidor istixanalarına rast gəlmək mümkündür. Burada əhali əsasən gündəlik qazancını istixanalarda yetişdirdiyi məhsulla əldə edir.
Kənd sakini Mürşüd Xudiyev də belə təsərrüfat sahibindən biridir. O, 7 ildən çoxdur şəxsi həyətində istixana şəraitində pomidor yetişdirməklə məşğuldur. Təsərrüfat sahibi ötən il 20 ton məhsul yığdığını deyir: “Bizim istixananın ərazisi 20 sotdur. Pomidor və xiyar becəririk. Əsasən “Orletta” sortundan olan pomidor toxumundan istifadə edirik. Yaxşı məhsuldar pomidordur. Keçən il də yaxşı məhsulumuz oldu. Bu il şükür Allaha, keçən ilkindən də yaxşıdır. Bir şitildən 7-8 kiloqram məhsul əldə edirik. Bu il istixanamızda 22-23 ton məhsul götürməyi planlaşdırırıq”.
İstixana ərazisində becərilən pomidor şitilləri damcı üsulu ilə suvarılır. Burada 5000-dən çox şitil əkini aparılıb. Təsərrüfat sahibi qeyd edir ki, əkin aparılarkən bütün aqrotexniki qaydalara riayət olunub. Bu da məhsulun daha bol olması ilə nəticələnib.
Bu gün təsərrüfat sahibini narahat edən əsas amil pomidorun satış qiymətidir. Fermer deyir ki, ilk vaxtlarda pomidorun 1 kiloqramının qiyməti yerində 2 manata idisə, indi bu qiymət 90-80 qəpik arasında dəyişir. Mütəxəssislər isə bunu pandemiya dövrü ilə əlaqələndirirlər.
Kənd təsərrüfatı mütəxəssisi Emin Xudiyev də bunu təsdiqləyir: “Bu günlərdə fermerlərin əkdiyi məhsulların qiymətinin belə aşağı düşməsi əsasən pandemiya ilə əlaqədardır. Məhsul bazarlara çıxsa da, alıcılıq zəifdir. Buna görə də fermer məhsulu istədiyi qiymətə sata bilmir. Karantin rejiminin yumşaldılması tezliklə bazarın da canlanmasına səbəb olacaq”.
Qeyd edək ki, hazırda Salyan rayonunda 138 hektar ərazidə 473 istixana mövcuddur. Ötən il bu istixanalarda 10 min tondan çox pomidor istehsal edilərək yerli və xarici bazarlara çıxarılıb.