Abşeron rayonunda 23 küçə və yolun təmiri davam etdirilir VİDEO
Bakı, 5 avqust, AZƏRTAC
Azərbaycan Avtomobil Yolları Dövlət Agentliyi tərəfindən Abşeron rayonu ərazisində kompleks tədbirlərin icrası davam etdirilir.
Agentlikdən AZƏRTAC-a bildirilib ki, Abşeron rayonunun Saray, Ceyranbatan, Mehdiabad, Qobu qəsəbələrinin və Masazır kəndinin ərazilərində ümumi uzunluğu 29,2 kilometr olan 23 küçə və yolda təmir işlərinin həyata keçirilməsi nəzərdə tutulur ki, bu istiqamətdə işlər görülür. Ümumilikdə təmir işlərinin əhatə edəcəyi sahə 240 min kvadratmetrdir.
Təmir işləri əsasən uzun müddət əsaslı şəkildə təmir olunmadan istismar olunan, yol örtüyünün vəziyyəti qənaətbəxş olmayan, həmçinin torpaq əsaslı və çınqıl örtüklü küçə və yollarda aparılır.
Artıq layihə üzrə Saray qəsəbəsində təmiri nəzərdə tutulan 5 küçədə işlər yekunlaşıb. Bu, uzunluğu 2,4 kilometr olan Heydər Əliyev prospekti, 1,2 kilometrlik Sülh və 1,4 kilometrlik Sabir küçələri, ümumi uzunluğu 1,1 kilometr olan 2 və 3 saylı orta məktəblərə gedən yollar, həmçinin Aşıq İmran küçəsidir. Təmir olunan küçələrin ümumi uzunluğu 6100 metr, sahəsi isə 60 min kvadratmetrdən çoxdur.
Masazır kəndində təmiri nəzərdə tutulan 7 küçədən 2-də işlər tamamlanıb. Bu, uzunluğu 720 metr olan Şıxəli Qurbanov və 1,9 kilometrlik Akim Abbasov küçələridir. Ümumi uzunluqları 4,4 kilometr, sahəsi 27 min kvadratmetrdən çox olan Qaçaq Nəbi, Hacı Zeynalabdin Tağıyev, Faiq Həsənov, Nazim Əsədov və İlyas Bayramov küçələrinin isə bu ilin sonunadək təmir olunaraq vətəndaşların istifadəsinə verilməsi planlaşdırılır.
Mehdiabad qəsəbəsi üzrə cari ildə təmiri nəzərdə tutulan 5 küçədən 1-də əsaslı yenidənqurma işləri artıq bitib. Söhbət uzunluğu 2 kilometr olan Qara Qarayev küçəsindən gedir. Qara Qarayev küçəsi Mehdiabad qəsəbəsinin əsas mərkəzi yollarından biri hesab olunur. Küçə Mehdiabad-Fatmayi-Goradil və Binəqədi-Novxanı avtomobil yollarını birləşdirərək, həm yol boyu yaşayan vətəndaşların, həm də bu yoldan istifadə edənlərin əlavə məsafə qət etmədən rahat və təhlükəsiz gediş-gəlişini təmin edir.
Sözügedən qəsəbə üzrə təmiri nəzərdə tutulan Cəfər Cabbarlı, Əhməd Cavad, Çingiz Mustafayev və İsmət Qayıbov küçələrində yenidənqurma işlərinə artıq start verilib. Ümumi uzunluğu 5,2 kilometr, sahəsi 39 min kvadratmetrdən çox olan sözügedən küçələrin təmiri ilin sonunadək yekunlaşdırılacaq.
Cari ildə Ceyranbatan qəsəbəsi üzrə əsaslı təmiri həyata keçirilməli olan Heydər Əliyev küçəsində aparılan yenədənqurma işləri isə artıq bitmək üzrədir. Uzunluğu 1,2 kilometr, sahəsi 10 min kvadratmetrdən çox olan küçədə işlərin qısa müddət ərzində yekunlaşdırılması üçün əraziyə lazımi sayda qüvvə cəlb olunub.
Qobu qəsəbəsində isə hazırda 4 küçədə təmir-tikinti işləri həyata keçirilir. Bu Qara Qarayev, Aşur Həsənbalayev, Sona Salmanova və Çingiz Mustafayev küçələridir. Sözügedən küçələrin ümumi uzunluğu 6,8 kilometr, təmir olunan sahə isə 62 min kvadratmetrdən çoxdur. Küçələr boyu torpaq işləri, yol əsasının tikintisi və hazır olan ərazilərə yeni asfalt-beton örtüyünün döşənməsi işləri aparılır. Yaxın günlərdə təmiri nəzərdə tutulan sonuncu küçədə - 860 metr uzunluğa malik Mirzə Ələkbər Sabir küçəsində də yenidənqurma işlərinə start veriləcək.
Ümumilikdə aparılan təmir-tikinti işləri çərçivəsində küçələr boyu zəruri olan yerlərdə köhnə örtük sökülür və yararsız qrunt qazılaraq çıxarılır, əvəzinə yararlı material tökülərək kipləşdirilir. Daha sonra isə yeni asfalt-beton örtüyünün döşənməsi icra olunur.
Qeyd olunan ərazilərdə təmir işlərinin həcmi ilkin olaraq ayrılmış vəsait hesabına aparılır. Növbəti mərhələlərdə sərəncam və investisiya proqramı ilə ayrılacaq vəsaitə uyğun, sözügedən qəsəbələr üzrə təmirə ehtiyacı olan digər küçə və yollarda da yenidənqurma işlərinin aparılması nəzərdə tutulur.
İşlərin vaxtında yekunlaşdırılması üçün ərazilərə lazımi sayda canlı qüvvə və texnika cəlb edilib.
Bölmənin digər xəbərləri
