REGİONLAR
İsmayıllılı fermer qadınlar AFAQ layihəsindən faydalanırlar VİDEO
İsmayıllı, 26 avqust, AZƏRTAC
Kənd Təsərrüfatı Nazirliyinin tabeliyində olan “Aqrar Tədarük və Təchizat” ASC tərəfindən həyata keçirilən, BMT-nin Ərzaq və Kənd Təsərrüfatı Təşkilatı (FAO) və “PAŞA Holding” tərəfindən dəstəklənən AFAQ layihəsi çərçivəsində qadın fermerlərlə növbəti görüş İsmayıllı rayonunun Sumağallı kəndində təşkil edilib.
Avqustun 26-da Sumağallıda keçirilən görüşdə İsmayıllı Rayon İcra Hakimiyyəti başçısının müavini, “Aqrar Tədarük və Təchizat” ASC-nin və BMT-nin Ərzaq və Kənd Təsərrüfatı Təşkilatının nümayəndələri, İsmayıllı Dövlət Aqrar İnkişaf Mərkəzinin (DAİM) direktoru, Sumağallı və Kürdmaşı kəndlərində fəaliyyət göstərən və layihə çərçivəsində keçirilən təlimləri uğurla tamamlayan qadın fermerlər iştirak ediblər.
AZƏRTAC-ın bölgə müxbiri xəbər verir ki, görüş zamanı qadın fermerlərin təsərrüfatlarına baxış keçirilib, təsərrüfat sahiblərinə ehtiyaclarına uyğun olaraq müvafiq avadanlıqlar (inkubator, medaqon, süd sağan aparat, seperator, yem üyüdən aparat və s.) verilib.
Vurğulanıb ki, layihənin ilkin mərhələsində 500-ə yaxın qadın fermer müraciət edib, onlardan 72 fermerin təsərrüfatına baxış keçirilərək qiymətləndirmə aparılıb. Yerli və xarici mütəxəssislər tərəfindən keçirilən təlim və konsultasiya dəstəyindən isə bu günə qədər 300-ə yaxın qadın fermer faydalanıb.
Qeyd edək ki, AFAQ layihəsi aqrar sahədə fəaliyyət göstərən qadınların dəstəklənməsi, onların bilik və bacarıqlarının artırılması, maliyyə və digər resurslara çıxışlarının asanlaşdırılması məqsədilə icra edilir. Bundan əvvəl isə Şamaxı rayonunun Məlikçobanlı kəndindən olan 3 qadın fermer də layihənin dəstəyindən faydalanıb. Onlara xırdabuynuzlu və iribuynuzlu kənd təsərrüfatı heyvanları verilib.
Sumağallı kəndində arıçılıqla məşğul olan, AFAQ layihəsindən faydalanan fermer Arzu Mirzəyeva AZƏRTAC-ın bölgə müxbirinə müsahibəsində deyib: “Yeddi ildir ki, araçılıqla məşğulam. İlk vaxtlar cəmi iki arı ailəm var idi. İndi ailələrin sayı 35-ə çatıb. Hər il orta hesabla 150-200 kiloqram bal götürürəm. Bu gün AFAQ mənə balsüzən aparat, geyim və digər texniki yardımlar edib. Layihənin təşkilatçılarına təşəkkürümü bildirirəm. Artıq təsərrüfatımı genişləndirmək üçün imkanlar yaranıb”.
Quşçuluq təsərrüfatı ilə məşğul olan, AFAQ layihəsi çərçivəsində dən, su qabı, yem doğrayan aparat alan Sumağallı kəndinin sakini, fermer qadın Luiza Tahirova da razılığını bildirib. O, geniş quş damının tikilməsinin nəzərdə tutulduğunu deyib.
Qeyd edək ki, layihənin meyarlarına uyğun gələn təsərrüfat sahiblərinə göstərilən texniki, konsultasiya və təlim dəstəyi bundan sonra da davam etdiriləcək. Layihədə iştirak etmək üçün qadın fermerlər afaq.az saytı vasitəsi ilə qeydiyyatdan keçə, ATT-nin Regional idarələrinə, eləcə də rayon DAİM-lərinə müraciət edə, 1652 və ya +994504008899 nömrəsi ilə əlaqə saxlaya bilərlər.