Malik Ayyub Sumbal: Ermənistan mülki insanları hədəfə almaqla Azərbaycan Ordusunun zəfər yürüşünə mane olmaq istəyir VİDEO
Pekin, 30 oktyabr, AZƏRTAC
Ermənistan Rusiya və ABŞ-ın vasitəçiliyi ilə əldə edilən atəşkəs razılaşmalarının qüvvəyə minməsindən sonra mülki insanların ölümünə səbəb olan hücumlar təşkil edib. Ermənilərin mülki insanları öldürmək əməlləri, əslində, diqqəti Dağlıq Qarabağdan yayındırıb başqa istiqamətə yönəltməkdir. Ermənistanın baş naziri Nikol Paşinyanın niyyəti diqqəti Dağlıq Qarabağda gedən döyüşlərdən yayındıraraq yeni mübahisələrə səbəb olmaq və Azərbaycan Ordusunun zəfər yürüşünü dayandırmaqdır. Amma bu niyyət iflasa uğrayıb və Azərbaycan Ordusunun xilaskarlıq missiyası davam edəcək.
Bu sözləri AZƏRTAC-ın müxbiri ilə söhbətində tanınmış geosiyasi təhlilçi, jurnalist Malik Ayyub Sumbal deyib. O bildirib ki, BMT Təhlükəsizlik Şurasının 4 qətnaməsinə əsasən, Dağlıq Qarabağ Azərbaycanın beynəlxalq səviyyədə tanınan ərazisidir. Azərbaycan təxminən 30 il bu qətnamələrin icrasını gözləyib. Amma ATƏT-in Minsk qrupu da daxil olmaqla, bütün vasitəçilərin ədalətin bərpasına yönələn səyləri nəticəsiz qalıb. Cari ilin iyulunda Tovuz hadisələrindən sonra münaqişənin dinamikası dəyişdi.
İndi dünya ictimaiyyətinin Ermənistanın danışıqlardan, dialoqdan kənar durduğunu, üstəlik, onun həm də təcavüzünü gördüyünü bildirən Malik Ayyub Sumbal əlavə edib ki, Ermənistan bir tərəfdən atəşkəs istəyir, digər tərəfdən isə atəşkəs razılaşmasından bir neçə saat sonra Azərbaycanın Gəncə, Tərtər, Bərdə kimi yaşayış məntəqələrinə raket və artilleriya zərbələri endirir. Nəticədə mülki insanlar arasında itkilər olub, hətta uşaqlar ölüb. Bildiyimə görə, ermənilərin belə hücumları nəticəsində bir ailənin 5 üzvü həlak olub. Dünya bu faktlar nəticəsində kimin təcavüzkar siyasət yürütdüyünü gördü.
Malik Ayyub Sumbal son hadisələrin ən sevindirici tərəfinin Azərbaycan Ordusunun Ermənistanın işğalı altındakı əraziləri azad etməsi olduğunu deyib. Bildirib ki, bəlkə də ermənilər bunu gözləmirdilər. Çünki onlar bu münaqişənin gedişində həmişə müəyyən güclərin arxasında gizləniblər. Amma bu dəfə Ermənistan dünyanın heç bir yerindən ciddi dəstək ala bilmədi. Beləcə, Ermənistanın Azərbaycan qarşısında təkbaşına, öz gücünə dayana bilmədiyi üzə çıxdı. Azərbaycan işğal altındakı torpaqlarını azad etməklə ədaləti təkbaşına necə bərpa etməyi dünyaya göstərdi.
Tanınmış jurnalist vurğulayır ki, bu hadisələr Prezident İlham Əliyevin çox güclü lider olduğunu bir daha sübut etdi. Prezident İlham Əliyev Ali Baş Komadan kimi döyüş əməliyyatlarına rəhbərlik edir, müvafiq əmrlər verir.
Malik Ayyub Sumbal təsisçisi olduğu “Azərbaycanın dostları” şəbəkəsinin Azərbaycan həqiqətlərinin, o cümlədən Qarabağ münaqişəsi barədə reallıqların dünyaya çatdırılmasına çalışdığını deyib. O bildirib: “Azərbaycanda çalışdığım vaxtlarda arabir ovaxtkı təmas xəttində yerləşən bölgələrə, o cümlədən Tərtər, Füzuli, Bərdə rayonlarına səfər edərkən erməni vandallığının şahidi olmuşdum. Mən işğal olunmuş torpaqlardan didərgin düşən azərbaycanlılarla çox söhbət etmişəm. Onların hamısı öz evlərinə qayıtmaq istəklərini dəfələrlə bildiriblər. Hətta öldükdən sonra məhz doğulduqları torpaqlarında dəfn olunmaları barədə vəsiyyət ediblər. Bunlar çox həssas məsələlərdir. Elə o zaman düşünürdüm ki, Azərbaycan həqiqətlərinin, əsasən də Ermənistanın təcavüzü barədə dəqiq məlumatların dünyaya çatdırılması üçün nə edə bilərik. Nəhayət, “Azərbaycanın dostları” adlı şəbəkə yaratmaq qərarını verdik”.
Həmsöhbətimiz deyir ki, beynəlxalq ictimaiyyətin Qarabağ məsələsi barədə daha çox məlumatlandırılmasına ehtiyac var. Çünki erməni təbliğatı Qarabağın min illər əvvəldən onlara məxsus olması barədə cəfəng fikirlər səsləndirirlər. Malik Ayyub Sumbal, həmçinin diqqətə çatdırıb: “Azərbaycan ədalət istəyir. Bizim şəbəkə də Azərbaycanın həqiqi dostlarını bir platformaya toplayaraq, bu ədalət istəyini dünyaya çatdırmağa çalışır. Ermənistan rəsmilərinin bəzi xarici media kanallarına müsahibələrində aparıcılar da təkid etdiyi kimi, biz real vəziyyəti müzakirə etməliyik. Reallıq isə ondan ibarətdir ki, ermənilər xarici qüvvələrin dəstəyi sayəsində Qarabağı işğal edib və həmin ərazilərdə qanunsuz məskunlaşdırma aparıblar. Bu, beynəlxalq hüquqa əsasən cinayətdir. Azərbaycan, sadəcə, öz ərazilərini Ermənistanın işğalından azad etmək istəyir. Ən böyük həqiqət məhz budur: “Qarabağ Azərbaycandır!”.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
