Beyləqan, 2 aprel (AZƏRTAC). Beyləqan rayonu ərazisində xocavəndli məcburi köçkünlər üçün salınmış Xocavənd qəsəbəsindəki mədəniyyət evində Azərbaycan Respublikasının Prezidenti Administrasiyasının rəhbəri, akademik Ramiz Mehdiyevin ideya rəhbərliyi ilə “Azərbaycan” qəzeti redaksiyasının kollektivi tərəfindən hazırlanmış “Azərbaycanlıların soyqırımı: Tarixin qanlı salnaməsi” ikicildlik kitabının təqdimat mərasimi keçirilmişdir.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin Xocavənd Rayon İcra Hakimiyyətinin inzibati binası qarşısındakı büstü önünə gül dəstələri qoyaraq xatirəsini ehtiramla yad etmişlər.

Rayon məktəblilərinin “Soyqırımı uşaqların gözü ilə” mövzusunda çəkdikləri rəsmlərə və ümumtəhsil məktəblərində eyni mövzuda keçirilmiş inşa yazı nümunələrinə baxış olmuşdur.

Tədbiri giriş sözü ilə açan Xocavənd Rayon İcra Hakimiyyətinin başçısı Eyvaz Hüseynov kitab haqqında məlumat verərək “Azərbaycanlıların soyqırımı: Tarixin qanlı salnaməsi” ikicildliyinin 31 mart - Azərbaycanlıların Soyqırımı Günü ərəfəsində işıq üzü görməsini mühüm hadisə kimi qiymətləndirmişdir.

Sonra Xocavənd Rayon İcra Hakimiyyətinin sifarişi əsasında kitabın təqdimatı münasibətilə soyqırımı mövzusunda çəkilmiş 15 dəqiqəlik sənədli filmə baxış keçirilmişdir.

Tədbirdə çıxış edən “Azərbaycan” qəzetinin baş redaktoru, Milli Məclisin deputatı Bəxtiyar Sadıqov bildirmişdir ki, kitabın birinci cildində XIX-XX əsrlərdə azərbaycanlılara qarşı törədilmiş soyqırımları haqqında ensiklopedik xarakterli məqalə və materiallar yer almışdır. Bu dövrdə ermənilərin Azərbaycana köçürülməsindən başlamış bu günədək ermənilərin həyata keçirdikləri soyqırımları ilə bağlı informasiyalar verilmişdir. Kitabda soyqırımı nəticəsində şəhid olmuş, itkin düşmüş, əsir götürülmüş insanlarla bağlı dəqiqləşdirilmiş rəqəmlərdən istifadə olunmuşdur.

Kitabın ikinci cildi sənədlər və arxiv materiallarından ibarətdir. Bu cild ulu öndər Heydər Əliyevin 20 Yanvar faciəsi ilə əlaqədar Azərbaycanın Moskvadakı daimi nümayəndəliyində keçirilmiş mətbuat konfransındakı bəyanatı ilə başlayır. Burada, həmçinin Prezident İlham Əliyevin nitqlərindən, çıxışlarından parçalar, Milli Məclisin bəyanatları və bu məsələ ilə bağlı tarixi sənədlər öz əksini tapmışdır.

Kitabın sonuncu bölməsi ermənilərin azərbaycanlılara qarşı törətdikləri soyqırımı cinayətlərindən bəhs edən fotoxronikadan ibarətdir. Burada xalqımızın son iki əsrdə məruz qaldığı soyqırımının faktlarla sübuta yetirilməsi baxımından mühüm əhəmiyyət kəsb edən fotolar toplanmışdır.

Tədbirdə Beyləqan Rayon İcra Hakimiyyətinin başçısı İrşad Əliyev, Milli Məclisin deputatı Elman Məmmədov, Salakətin kənd orta məktəbinin tarix müəllimi Telli Alıyeva və başqaları çıxış edərək, tarixi sənədlər və faktlarla zəngin, ermənilərin azərbaycanlılara qarşı törətdikləri soyqırımı cinayətlərindən bəhs edən fotoların da verildiyi “Azərbaycanlıların soyqırımı: Tarixin qanlı salnaməsi” ikicildliyinin əhəmiyyətini vurğulamışlar.

Tədbir iştirakçıları sonra Salakətin kənd orta məktəbində şagird və müəllimlərlə, uşaq bağçasında tərbiyə alan körpələrlə görüşmüş, şəhid ailəsi Sevil Əzizovanın və Ağamirzə Həsənovun evlərinə baş çəkmiş, Xocavənd rayonunun Nərgiztəpə ərazisində Qarabağ müharibəsində şəhid olmuş Vətən övladlarının xatirəsinə ucaldılmış abidə kompleksini ziyarət etmişlər.