Neftçalalı pambıqçılar bu il birinci olmaq üçün var gücləri ilə çalışırlar VİDEO
Neftçala, 2 sentyabr, İsmayıl Cəfərli, AZƏRTAC
Ölkəmizdə pambıqçılığa göstərilən dövlət dəstəyi nəticəsində bu sahəyə maraq hər il daha da çoxalır. Bu, bütün pambıqçılıq rayonlarında olduğu kimi, Neftçala da özünü göstərməkdədir. Neftçalalı pambıqçılar bu il ölkə üzrə birinci olmaq əzmindədirlər.
AZƏRTAC xəbər verir ki, ötən il Neftçala rayonunda pambıq mövsümü uğurlu olub. Belə ki, rayon üzrə ümumilikdə 5972 hektar sahədən 23 min 41 ton “ağ qızıl” yığılıb. Bu göstərici 21 pambıqçılıq rayonu arasında Neftçalanı ikinci sırada qərarlaşdırmışdı. Bu il də Neftçalada pambıq sahələrində vəziyyət ürəkaçandır. Çiyid səpinini optimal müddətdə aparan fermerlər bu işləri vaxtından əvvəl başa çatdırıblar. Rayonda fəaliyyət göstərən 3 şirkət 1386 istehsalçı ilə müqavilə bağlayıb. Fermerlər bu mövsüm Neftçala rayonunun pambıqçılıq üzrə birinci yerdə olması üçün var gücü ilə çalışırlar.
Neftçala Dövlət Aqrar İnkişaf Mərkəzinin bitkiçilik sektorunun müdiri Vidadi Bağırov bildirib ki, 2020-2021-ci təsərrüfat ilində Neftçala rayonunda 6849 hektar sahədə çiyid əkini aparılıb. Becərmə dövründə tarlalarda bütün aqrotexniki qulluqlar edilib. Dövlət tərəfindən fermerlərə böyük dəstək verilib. Dövlət Aqrar İnkişaf Mərkəzinin əməkdaşları tərəfindən yerlərdə maarifləndirici görüşlər keçirilib. Bunun nəticəsidir ki, sahələrdə bol məhsul yetişdirilib.
“Hazırda rayonumuzda tarlalarda “ağ qızıl” boldur. Pambığın alış qiymətində artım fermerləri daha da həvəsləndirib. Çalışacağıq ki, bu il məhsuldarlıq daha da yüksək olsun. Respublikada birinciliyi əldə edək”, - deyə o vurğulayıb.
Pambıqçılar dövlət dəstəyinin onlar üçün önəmli olduğunu qeyd edirlər. Ötən ay pambığın hər tonunun alış qiyməti 50 manat artırıldı. Bununla da fermerlərin gəlirləri daha da çox olacaq. Bu, Prezident İlham Əliyevin fermerlərə göstərdiyi qayğı və diqqətin növbəti təzahürüdür.
Uzun illərdir təsərrüfatın bu növü ilə məşğul olan pambıq ustası Rafael Hüseynov da dövlətin onlara göstərdiyi qayğıdan razıdır. Ötən il 42 sentner məhsul toplayıb dövlətə təhvil verən fermer bu il bu rəqəmin daha çox olacağını deyir: “Ötən il təsərrüfatımızda 40 hektar sahədə pambıq əkini aparmışam. Həmin sahələrdən 42 sentner məhsul toplayıb dövlətə təhvil vermişik. Bu il isə 37 hektar sahədə əkin aparılıb. Gördüyünüz kimi, aqrotexniki qaydalara vaxtında riayət etməyimizlə yüksək məhsuldarlığa nail olmuşuq. Bir neçə günə pambıq sahələrində defolyasiya işlərinə başlayacağıq. On gündən sonra yığım işləri həyata keçiriləcək”.
Neftçalada bütün bunlarla yanaşı, meliorasiya və su təsərrüfatı sahəsində də işlər davam edir. Belə ki, Neftçala rayon Suvarma Sistemləri İdarəsi pambığın inkişafında mühüm rol oynayan su kanallarının lildən təmizlənməsi prosesini həyata keçirib. Rayon ərazisində 1027 kilometr uzunluqda su kanalı mövcuddur. Bu kanalların 292 kilometri idarə tərəfindən lildən təmizlənib, 65 hidrotexniki qurğu təmir edilib. Bundan başqa, Neftçala rayon Suvarma Sistemləri İdarəsi 980 metr uzunluğunda B-3 nov kanalının tikintisini başa çatdırıb və 650 metrlik Uzunbabalı nov kanalının inşasına başlayıb.
Neftçala rayon Suvarma Sistemləri İdarəsinin sudan istifadə şöbəsinin rəisi Məmməd İsmayılov deyib: “Rayon ərazisində 6849 hektar pambıq sahəsi vaxtında arat olunub, birinci su ilə təmin edilib, hazırda ikinci suvarma yekunlaşmaq üzrədir. 2700 hektar sahədə suvarma aparılıb. Rayonda suvarma ilə bağlı çətinliyimiz vardı. Kür çayında suyun azalması, nasosların fasilələrlə işləməsi suvarmada gecikmələr yaratsa da, bu problem aradan qaldırıldı. Buna baxmayaraq, idarə tərəfindən çalışdıq ki, fermerlərə vaxtında su verilməsinə köməklik edək. Hazırda sahələrdə suvarma yekunlaşmaq üzrədir”.
Qeyd edək ki, neftçalalı pambıqçılar bu il əsasən “ağ qızıl”ın “Bəyaz Altun”, “Karlo Karizma”, “Gəncə 100”, “Gəncə 114” kimi yüksək reproduksiyalı sortlarına üstünlük veriblər. Fermerlər pambıq yığımına vaxtından tez başlamaq niyyətindədirlər. Havaların normal keçməsi buna münbit şərait yaradır. Onu da bildirək ki, ötən il ölkədə 336 min tondan artıq pambıq istehsal olunub. Pambıq üzrə orta məhsuldarlıq 33,6 sentner təşkil edib. Bu, son illər pambıqçılıqda qeydə alınan ən yüksək məhsuldarlıqdır.
Bölmənin digər xəbərləri
