Azərbaycanın son 20 ildə keçdiyi yol Yeni Azərbaycan Partiyasının şərəf tarixi, şərəf salnaməsidir
Beyləqan, 9 noyabr (AZƏRTAC). Beyləqan rayonu ərazisində salınmış Xocavənd qəsəbəsində Yeni Azərbaycan Partiyasının (YAP) yaranmasının 20-ci ildönümünə həsr olunmuş tədbir keçirilmişdir.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin qəsəbədəki abidəsi önünə gül dəstələri qoyaraq əziz xatirəsini ehtiramla yad etmişlər.
Rayon mədəniyyət evində keçirilən tədbirdə YAP Xocavənd rayon təşkilatının sədri Məhəmmədəli Bayramov çıxış edərək partiyanın yaranma tarixi və uğurlu fəaliyyətindən danışmışdır. Bildirilmişdir ki, ictimai-siyasi proseslərin mürəkkəb, kəşməkəşli axarda cərəyan etdiyi bir vaxtda dahi şəxsiyyət Heydər Əliyevin rəhbərliyi ilə 1992-ci il noyabrın 21-də təsis edilən YAP qısa müddətdə ölkənin gələcək taleyini müəyyənləşdirən əsas qüvvəyə çevrilən siyasi qurum olmuş, xalqa xidmət missiyasını şərəflə yerinə yetirmişdir. Azərbaycanın son 20 ildə keçdiyi yol Yeni Azərbaycan Partiyasının şərəf tarixi, şərəf salnaməsidir.
Tədbirdə YAP Siyasi Şurasının üzvü Yusif Hümbətov, Xocavənd Rayon İcra Hakimiyyətinin başçısı Eyvaz Hüseynov və başqaları çıxış edərək iştirakçıları əlamətdar gün münasibətilə təbrik etmiş, partiyanın keçdiyi inkişaf yolundan, Azərbaycanın uğurlarındakı rolundan danışmışlar.
Yubiley tədbiri rəngarəng bayram konserti ilə başa çatmışdır.
Bölmənin digər xəbərləri
