2016-cı ilədək maye-kristal televizorlar “LED” işıqlandırma sistemi ilə təchiz olunacaqdır
Bakı, 2 noyabr (AZƏRTAC). 2013-cü ildə fon işıqlanması qismində diodlu işıqlandırmadan (LED) istifadə olunan maye-kristal televizorların (LCD) bazar payı 90 faizə çatacaqdır. Bu barədə “IHS” analitik-informasiya agentliyinin tərkibinə daxil olan “IMS Research” tədqiqat şirkətinin analitikləri proqnoz vermişlər.
Analitiklərin qiymətləndirməsinə əsasən, cari ildə televizorlar üçün tədarük edilməsi gözlənilən 231 milyon maye-kristal panelin 207 milyonu işıq diodlu işıqlandırma ilə təchiz ediləcəkdir. Qalan 24 milyon əvvəlki nəsil texnologiyaların tətbiqi ilə soyuq katodlu flüorasan lampalar (CCFL) əsasında yaradılacaqdır.
Mütəxəssislər proqnozlaşdırır ki, 2016-cı ilədək bazara tədarük edilən maye-kristal televizorların 100 faizi işıq diodlu işıqlandırma ilə təchiz ediləcəkdir.
Hazırda Yaponiyanın “Sharp” şirkəti “CCFL” işıqlandırma ilə təchiz olunan “LCD” panellərin istehsalını tam dayandırmışdır. Cənubi Koreyanın “Samsung” və “LG” şirkətləri də bunu etməyə hazırlaşır. Belə ki, onların istehsal etdikləri maye-kristal televizorların 95 faizində diodlu işıqlandırmadan istifadə edilir. İlin sonunadək isə nisbətin daha yüksək olacağı gözlənilir.
Bölmənin digər xəbərləri
