REGİONLAR
Salyan, Neftçala və Sabirabad rayonlarının 15-ə yaxın kəndində arx və kanallar lildən təmizlənir VİDEO
Bakı, 7 dekabr, AZƏRTAC
Salyan, Neftçala və Sabirabad rayonlarının 15-ə yaxın kəndində arx və kanallarda lildən təmizləmə işləri davam edir.
Meliorasiya və Su Təsərrüfatı Açıq Səhmdar Cəmiyyətinin nümayəndəsi Dilqəm Şərifov AZƏRTAC-a bildirib ki, 1977-ci ildən fəaliyyətə başlayan Aşağı Muğan Meliorativ Sistemlərinin İstismarı İdarəsi Salyan, Neftçala və Sabirabad rayonlarında 132500 hektar əkin sahəsinə xidmət edir. Adıçəkilən rayonların ərazisində 3260 kilometrdən artıq kollektor drenaj sistemləri mövcuddur. Kollektor drenaj sistemlərinin üzərində isə 3226 ədəd hidrotexniki qurğu var. Hidrotexniki qurğulardan bu il 47 ədədi cari təmir olunub.
İdarə tərəfindən il ərzində mütəmadi olaraq lildən təmizləmə işləri də həyata keçirilir. Bu ilin əvvəlindən etibarən mexanizmlər vasitəsilə 430 kilometrdən artıq məsafədə lildən təmizləmə işləri görülüb. Dənizə vurulan drenaj suları 710 milyon kubmetr, dənizə axıdılan duz isə 3.191 min ton olub.
Aşağı Muğan Meliorativ Sistemlərinin İstismarı İdarəsinin balansında 25 nasos stansiyası fəaliyyət göstərir və onların məhsuldarlığı 85m3/san təşkil edir. 2022-ci ildə Salyan, Neftçala və Sabirabad rayonlarında 32000 hektara yaxın pambıq, 60000 hektara yaxın taxıl, 42000 hektara yaxın yem bitkiləri əkilib. İdarə tərəfindən plana uyğun olaraq balansda olan 10 ədəd nasos stansiya, 68 ədəd nasos aqreqatı və 71 ədəd elektrik mühərriki təmir edilib.