Bakı, 19 dekabr, AZƏRTAC

Uşaqlıqdan mütaliə etməyə və ədəbiyyata olan böyük marağı Leylanı gənc yaşlarında kitab yazmağa həvəsləndirb. İstedadlı gənc Leyla Xəlilzadə maraqlı obrazların yer aldığı və fantaziya ilə zəngin “Həqiqəti gizlədən yalanlar” adlı ilk kitabını 12 yaşında yazıb. Leylanın ingilis dilində triller janrında qələmə aldığı əsər oxucuda onun həvəskar deyil, sanki püxtələşmiş bir qələm sahibi tərəfindən yazıldığı təəssüratını doğurur.

Leyla Xəlilzadə 2008-ci il martın 23-də Bakıda anadan olub. 2014-2015-ci illərdə Bakı Oksford Məktəbində, 2015-2018-ci illərdə isə Avropa Azərbaycan Məktəbində təhsil alıb. Hazırda Bakıda fəaliyyət göstərən Dünya Məktəbində ingilis dili bölməsi üzrə 9-cu sinifdə oxuyur. Çoxsaylı məktəbdaxili, eləcə də beynəlxalq müsabiqə və yarışlarda, bilik olimpiadalarında fəal iştirak edən Leyla bir çox diplom və sertifikatlar qazanıb. O, eyni zamanda, Türkiyə və Azərbaycanın müvafiq məktəbləri arasında həyata keçirilən “İki ölkə, bir hekayə” layihəsinin fəal iştirakçısı olub, bu mövzuda yazdığı hekayə yüksək qiymətləndirilib.

Triller, fantastika, müəmma - Həqiqəti gizlədən yalanlar

Əsərlə tanışlıq müəllifin 12 yaşında malik olduğu məntiqi təfəkkürünü, fantaziya gücünü, analiz qabiliyyətini üzə çıxarır. “Həqiqəti gizlədən yalanlar” kitabı 20 yaşlı fövqəl bacarıqlara malik Pörl adlı bir qızın macəra dolu həyatından bəhs edir. Pörl təzyiqlərlə üzləşərək istəmədiyi missiyanı illərlə yerinə yetirmək məcburiyyətində qalır. Ancaq “xilaskarları”nın sayəsində sonda həmin missiyanı yerinə yetirməkdən canını qurtarır. Pörlün həm güclü və sadiq əhatəsi, həm də çox təhlükəli düşmənləri var və daim həyəcan dolu hadisələrlə üz-üzə qalır. “Bəs o, düşdüyü çətin və təhlükəli vəziyyətlərdə necə baş çıxara bilir?”, “Bir çox xüsusiyyətlərə malik olan bu qız niyə həmişə kədərlidir, onu narahat edən məsələlərə aydınlıq gətirə, düşmənlə bacara bilirmi?”. Hadisələrin gedişində oxucu artan maraq və həyəcanla bu düşündürücü suallara cavab axtarır. Müəllif dərin bədii təfəkkürünün və zəngin dünyagörüşünün sayəsində fikirlərini böyük məharət və yüksək peşəkarlıqla qələmə alıb.

Leyla bədii-fantastik düşüncələrini ingilis dilində məharətlə ifadə edir

Hazırda 14 yaşında olmasına baxmayaraq, Leyla yazılarında dərin müşahidə qabiliyyətindən irəli gələn fikir və düşüncələrini ingilis dilində məharətlə ifadə edə bilir. “İngilis dilinə olan böyük maraq və həvəsim, eyni zamanda, bu dildə təhsil almağım məni öz fikirlərimi, duyğularımı bu dildə bədii şəkildə ifadə etməyə ruhlandırdı. Məhz bundan irəli gələrək ingilis dilində bir əsər yazmaq qərarına gəldim. Həm də uşaqlıqdan triller janrında olan filmlərə və əsərlərə böyük marağım var idi, daha çox tarixi, müəmma və fantastika mövzularında kitablar oxuyurdum. Ona görə də oxuduqlarımdan həvəslənərək 12 yaşımda kitab yazmağa başladım və bir il ərzində başa çatdırdım. İlk növbədə, obrazları fikirləşdim, onların bir-biri ilə münasibətini təhlil etdim. Ailəmdən böyük dəstək gördükdən sonra bu əlyazımı kitaba çevirmək qərarına gəldim. Kitab əsasən triller, fantastika janrında olduğu üçün burada oxucuya öz fikirlərimi, fantaziyamı çatdırıram. Ümid edirəm ki, gənclər bu kitabı oxuduqdan sonra mütaliəyə daha çox üstünlük verəcəklər”,- deyə Leyla bildirir. O, ingilis dilindən başqa türk, rus və alman dillərində də mükəmməl öyrənmək üçün səylə çalışdığını söyləyir. Onun digər dillərə olan marağı bu istiqamətlərdə irəliləyişini sürətləndirir. Rəsm və musiqi ilə də məşğul olan Leyla artıq bu sahələrdə də böyük uğurlar qazanıb.

Kitab Azərbaycan və ingilis dillərində oxuculara təqdim olunub

“Həqiqəti gizlədən yalanlar” kitabı Azərbaycan Dövlət Tərcümə Mərkəzi tərəfindən doğma dilimizə tərcümə olunub və çap edilib.

Leyla Xəlilzadənin dostları, müəllimləri, ailə üzvləri və yaxınları onun ingilis və Azərbaycan dillərində işıq üzü görmüş “Həqiqəti gizlədən yalanlar” əsərinin “LİBRAFF” Kitab Evində təqdimatına toplaşdı. Çıxış edənlər Leylanın gənc olmasına baxmayaraq mükəmməl bir əsər yazdığını söylədilər.

Oxuduğu kitablar, zəngin mütaliə onun bədii təfəkkürünün formalaşmasında mühüm rol oynayıb. Kitaba olan sevgi, məhəbbət onun idrakında, ağlında olan reallıqdır. Gənc yazarın bədii təxəyyülünün, obrazlı və məntiqi təfəkkürünün məhsulu olan əsər 22 fəsildən ibarətdir. O, səhifələrdə yaratdığı nağıl dünyasında bədii düşüncəni, fantaziyasını, intellektual fikrini yüksək səviyyədə oxucuya çatdırıb. Kitabda diqqət çəkən əsas məqamlardan biri də fəsillərin adlarının xüsusi peşəkarlıqla seçilməsidir. “Həyata dönüş”, “Təbəssümlər və yalanlar”, “Keçmişdən bu günə”, “Səbir açardır”, “Daş və şayiə”, “Yeni cığır”, “Gözlərdəki yalvarış”, “Keçmiş sirlərin gizli həqiqəti” sərlövhəli fəsillərin adları isə böyük fəlsəfi məna daşıyır. On iki yaşlı gəncin zəngin təfəkkürünün məhsulu olan kitabda dostluq, ailə, sevgi, insanlıq və digər mövzularda müdrik fikirlər yer alıb, haqsızlıq, xəyanət, yalan isə pislənir.

L.Xəlilzadənin uğuruna sevinənlər sırasında onun müəllimləri də var. Onlar Leylanın mütaliəyə olan böyük həvəsini yüksək qiymətləndiriblər: “Çox ağıllı, məsuliyyətli və bacarıqlı olan Leyla fərqli düşüncəsi, çalışqanlığı, əzmi və cəsarəti ilə seçilir. Dərslərinə hər zaman hazırlıqlı gələn Leyla mütaliədən zövq alır. Onun bədii təfəkkürünün, intellektual zəkasının formalaşmasında hər zaman Leylaya dəstək olan ailəsinin də böyük rolu olub”.

Çıxış edənlər gənc yazarı təbrik edib, ona gələcək yaradıcılıq yolunda uğurlar arzulayıblar.

Kitab oxumağı çox sevən Leyla həmyaşıdlarına dünyagörüşlərini və biliklərini zənginləşdirmək üçün çoxlu mütaliə etməyi məsləhət görür. Müəllif imzalı kitablarını qonaqlara və oxuculara hədiyyə edib.

Qeyd edək ki, “Həqiqəti gizlədən yalanlar” kitabının təqdimatı L.Xəlilzadənin təhsil aldığı Dünya Məktəbində də keçirilib.

14 yaşlı Leyla arzularını bölüşür

Leyla Xəlilzadə növbəti kitablarında özünün çəkdiyi rəsmlərdən də istifadə etmək istəyir. O, fantastika, müəmma dolu əsərlərlə yanaşı, tarixi, klassik və bestseller kitabları da oxumağı çox xoşlayır. On dörd yaşlı qız arzularını bizimlə bölüşür: “Gələcəkdə bu sahədə fəaliyyətimi davam etdirmək və yeni əsərlər yazmaq niyyətindəyəm. Həm də “Həqiqəti gizlədən yalanlar” kitabımın davamını yazmaq istəyirəm. Arzularımdan biri də bu ilk əsərimin digər xarici dillərə də tərcümə olunması və ekranlaşdırılmasıdır. Əminəm ki, maraqlı obrazların yer aldığı, fantaziya ilə zəngin süjet xətti olan bu əsərin ekran təcəssümü də tamaşaçılar tərəfindən böyük maraqla qarşılanacaq. Məni dəstəkləyən ailəmə və hər kəsə təşəkkürümü bildirirəm”. Mütaliəni çox sevdiyi üçün hər zaman kitab oxuyan insanlarla ünsiyyətdə olduğunu deyən gənc yazar ilk nəşrini bütün ədəbiyyatsevərlərə həsr etdiyini söyləyib.

“Həqiqəti gizlədən yalanlar” Leyla Xəlilzadənin ilk əsəri olsa da, əminik ki, Leyla əzmi, fədakarlığı və çalışqanlığı ilə gələcəkdə daha böyük nailiyyətlərə imza atacaq. Həmçinin dərin məntiqi təfəkkürü, zəngin dünyagörüşü və güclü təhlil qabiliyyəti onun növbəti əsərlərinə daha peşəkar yanaşma nümayiş etdirəcəyini söyləməyə əsas verir. İstedadlı gəncimizi təbrik edir, ona yeni yaradıcılıq uğurları arzulayırıq.