Onlar hədəflərinə çatdı…VİDEO
Bakı, 22 iyun, Xəyalə Cəfərova, AZƏRTAC
Dövlət İmtahan Mərkəzinin ali məktəblərə I qrup üzrə qəbul imtahanında 2 nəfər maksimal nəticə əldə edib. Belə ki, Bakı şəhər 299 saylı orta məktəbin məzunu Emil Abdullayev, 147 saylı Texniki-humanitar təmayüllü liseyin məzunu Saud Hüseyn bütün sualları doğru cavablandıraraq 400 bal toplayıblar.
Abituriyentlər uğur hekayələrini AZƏRTAC-la bölüşüblər.
Rus bölməsinin məzunu Emillə söhbətimiz zamanı öyrəndik ki, o, imtahana hazırlaşarkən böyük zəhmət çəkib, yuxusuz gecələr keçirib; “Son iki il fasilə vermədən imtahanlara hazırlaşdım. Əvvəl çox çətin idi. Çünki proqram böyük, fənlərin dərs yükü isə ağır idi. Müəyyən məqamlara daha çox diqqət etmək, daha güclü çalışmaq lazım gəlirdi”.
Gecə-gündüz yüksək əzmlə çalışan Emil deyir ki, gününün əsas hissəsini həmişə dərslərə ayırıb: “Məktəbdə 3 ya 4 dərsim olan günləri hazırlıqlarım axşam saatlarına təsadüf edirdi. Saat 21:00-dan gecə 02:00-dək, bəzən isə daha gec saatlara kimi ev tapşırıqlarımı yerinə yetirirdim. Elə olub ki, səhərədək yatmayıb əlavə test tapşırıqlarına vaxt ayırmışam. Beynimi çox yormamaq üçün 10-15 dəqiqə fasilə edirdim. Anam dəftər-kitabımı səliqəyə salırdı ki, evə gələn kimi əlavə işlərə vaxtım getməsin... Atam da işdən sonra bütün diqqətini mənə ayırırdı. Bacımın mənəvi dəstəyi isə ayrıca güc verirdi. Onlar “Biz sənə inanırıq!” deyirdilər”.
Bütün bu dəstək Emilin imtahanda uğur qazanması, arzuladığı ən yüksək nəticəyə nail olması üçün idi. Beləcə, E.Abdullayev ilk olaraq buraxılış imtahanında 281 bal topladı: “Qəbul imtahanının buraxılış imtahanından daha çətin olacağını bilirdim. Ona görə də müəllimlərimdən xahiş etdim ki, son iki ayı bütün proqramı təkrar edək”.
Sualların hamısını doğru cavablandırdığından əmin olan müsahibimiz deyir ki, imtahan zamanı kodlaşdırmaya xüsusi diqqət edib: “İki saata riyaziyyat, kimya və fizikanın qapalı suallarını, ən sonda isə açıq tipli test tapşırıqlarını cavablandırdım. Qalan bir saatımı isə kodlaşdırmaya ayırdım”.
Emilin anası Elvira Abdullayeva imtahan nəticələri açıqlananda sevincdən göz yaşlarını saxlaya bilməyib: “Nəticələr açıqlananda oğlum evdə deyildi. Ona zəng edib belə söylədim: “Sən çox həyəcanlısansa, bizsiz açıb baxma, evə gəl birlikdə baxaq”. Telefonu yerə qoyduqda isə atası “400-dən 400-ü yığmışıq”,- deyə yüksək səslə qışqırdı... Qanadlarım olsaydı, o an sevincdən uçardım. Məni kövrəldən digər məqam isə Emilin bu uğurunu 8 ay öncə dünyasını dəyişən dayısına həsr etməsi oldu. Çünki o, qardaşıma maksimal balı yığacağını söz vermişdi. Oğlum sözünün arxasında dayandı...Hər bir valideynə övladı ilə belə qürur duymağı arzu edirəm”.
Ailənin sevinci bununla yekunlaşmır. Növbəti zəng onları daha da sevindirir: “Əvvəldən düşünürdük ki, seçimimiz Bakı Ali Neft Məktəbi olacaq. Elə sevincimizin son həddi o idi ki, oranın nümayəndəsi zəng etdi. Emilin ümumi balı və ixtisas seçimi ilə maraqlandı”.
Növbəti gəncimiz Saud Hüseyn təkcə qazandığı yüksək nəticə ilə yox, həm də adı ilə diqqət çəkir: "Saud adı ərəb mənşəlidir, mənası uğur deməkdi. Valideynlərim bu adı mənə uğur gətirsin deyə qoyublar və elə də oldu..."
O, uğur hekayəsini bizimlə bölüşür: "Həyatda nəyəsə nail olmaq üçün hədəf müəyyənləşdirmək lazımdır. Təhsil aldığım 11 ildə daim birinci olmağı qarşıma məqsəd qoymuşdum. Şükürlər olsun ki, belə də oldu...Buraxılış imtahanından 286 bal topladım. Qalan gücümü növbəti imtahana hazırlaşmağa sərf etdim".
Sağlam bədəndə sağlam ruh olar deyən Saud hobbi olaraq idmanla məşğul olur: "Fasilə vaxtı idman edirdim. Bu hobbim mənim beynimi yorulmağa qoymurdu. İdman edərkən bir növ dincəlirdim".
Saud qəbul imtahanında bütün sualları 1 saat 20 dəqiqəyə doğru cavablandırıb. Universitet seçiminə gəlincə o deyib: "Hədəfim Bakı Ali Neft Məktəbinin kimya mühəndisliyi ixtisasına qəbul olmaqdır. Ola da bilər ki, Avropa ölkələrindən birinə və ya Türkiyəyə yollanım. Məqsədim ixtisasımı magistr elmi dərəcəsinədək davam etdirib gələcəkdə bütün bilik və bacarıqlarımla dövlətimə fayda verməkdir".
Emil və Saudun simasında bütün abituriyentləri təbrik edir, nəticəsindən narazı olanları həvəsdən düşməməyə, növbəti ay keçiriləcək ikinci cəhd imtahanına daha yaxşı hazırlaşmağı məsləhət görürük.
Bölmənin digər xəbərləri
