“Lanver 457” və “Balqabaq çubuqları” - Lənkəran mətbəxində yeni dad VİDEO
Lənkəran, 28 noyabr, İlkin Adıyev, AZƏRTAC
Lənkəran mətbəxinin qida rasionuna daha iki yemək daxil olub. “Lanver 457” və “Balqabaq çubuqları” adı verilən bu yeməklər Lənkəran Peşə Liseyinin mətbəx ustaları tərəfindən hazırlanıb.
AZƏRTAC-ın bölgə müxbiri xəbər verir ki, “Lanver 457” və “Balqabaq çubuqları” adlarına bundan sonra Lənkəran mətbəxində rast gəlmək mümkün olacaq. Lənkəranlı aşpaz Ağakərim Zeynallının ilk dəfə olaraq hazırladığı bu yeməklər həm görünüşünə, həm də dadına görə fərqlənir.
“Lanver 457” ana yemək, “Balqabaq çubuqları” isə desertdir. Ana yeməyin hazırlanması 20-25 dəqiqəyə başa gəlir və bunun üçün can əti, nar, kartof, badımcan, soğan, eləcə də ədviyyatlardan duz, istiot, giləmərzə, sumaq lazımdır. Əvvəlcə can əti, sonra soğan, kartof, badımcan, nar soyulur və doğranılır. Doğranılan məhsullar müvafiq qaydada yağda qızardılır. 10-15 dəqiqədən sonra ana yemək hazır olur. “Balqabaq çubuqları”nın hazırlanmasına isə təxminən 7-8 dəqiqə vaxt lazım olur. Bunun üçün ilk olaraq balqabaq “barmaq” formasında dilimlənir və əvvəlcədən hazırlanan sous, pudra və suxariyə salınır.
“İlk dəfə olaraq hazırladığımız yeməkləri milli mətbəxə daxil etməyə çalışırıq. Biri ana yeməkdir, digəri desertdir. Desertin tərkibində un, balqabaq üstünlük təşkil edir. Yeməyimiz isə can ətindəndir. Bunun da adı “Lanvert” ana yeməyidir. Bu yeməklərin kalorisi az olduğu üçün hər kəs yeyə bilər. Çünki yeməyin tərkibi tərəvəzlərlə zəngindir. Bir nəfər üçün desertin satışı təxminən 6-7 manat dəyərində ola bilər, ana yemək isə 15 manat civarında olacaq. Bu yeməkləri Lənkəran mətbəxinə rəsmi olaraq salmaq üçün Milli Kulinariya Mərkəzinə müraciət etməyi nəzərdə tutmuşuq” , - deyə aşpaz Ağakərim Zeynallı bildirir.
Aşpazın sözlərinə görə, Lənkərana gələn qonaqlar yerli, milli və müasir yeməklər haqqında maraqlanırlar. Ona görə də o, milli adət-ənənələrimizi qoruyub saxlamaq şərti ilə yeməklərdə təkminləşdirmə aparıb.
Ağakərim Zeynallı gələcəkdə daha çox dəniz məhsullarından yeni yeməklərin hazırlanmasını düşünür. Bunun üçün müəyyən təkliflər də var və o, bu təkliflər üzərində çalışır.
Bölmənin digər xəbərləri
