İtaliyada Dünya Azərbaycanlılarının Həmrəyliyi Günü qeyd edilib VİDEO
Roma, 29 dekabr, AZƏRTAC
Azərbaycanın İtaliyadakı və Müqəddəs Taxt-Tacdakı səfirliklərinin təşkilatçılığı ilə 31 Dekabr - Dünya Azərbaycanlılarının Həmrəyliyi Günü və Yeni il münasibətilə bayram tədbiri keçirilib. Tədbirdə İtaliyada yaşayan, təhsil alan və işləyən soydaşlarımız iştirak ediblər.
AZƏRTAC xəbər verir ki, Azərbaycanın Müqəddəs Taxt-Tacdakı səfiri İlqar Muxtarov həmvətənlərimizi Dünya Azərbaycanlılarının Həmrəyliyi Günü və Yeni il münasibətilə təbrik edib, xalqımız üçün ən möhtəşəm günlərdən biri olan Həmrəylik Gününün məhz Ulu Öndər Heydər Əliyev tərəfindən təsis olunduğunu bildirib. Qeyd edib ki, hazırda Ümummilli Liderin ruhu çox şaddır. Çünki Həmrəylik Günü təsis olunarkən əsas niyyətlərdən biri siyasi və dini əqidəsi, eləcə də milli mənsubiyyətindən asılı olmayaraq Azərbaycan xalqının birliyinə və öz torpaqlarını düşmən işğalından azad etməsinə nail olmaq idi. Biz bu gün Ulu Öndərin arzularının həyata keçdiyinin şahidi olduq. Artıq öz ərazi bütövlüyünü tam olaraq bərpa etmiş, qalib xalqın nümayəndələri kimi gələcəyə doğru inamla addımlar atırıq.
Səfir Azərbaycan-Müqəddəs Taxt-Tac münasibətlərindən bəhs edib, bu əlaqələrin qurulmasında Ümummilli Liderin rolunu xüsusi vurğulayıb. Bildirib ki, Ulu Öndərin dərin siyasəti nəticəsində ölkəmiz daim multikultural, bütün dinlərin və millətlərin nümayəndələrinin azad şəkildə yaşadığı ölkə kimi beynəlxalq ictimaiyyət tərəfindən tanınıb. Məhz buna görə də, Papa II İohan Pavel və Papa Fransisk ölkəmizə səfərləri zamanı Azərbaycanı tolerantlıq mərkəzi adlandırıblar. Bu, Azərbaycan xalqının əsrlərdən bəri sahib olduğu böyük dəyərlər və ölkə rəhbərliyinin uğurlu siyasəti nəticəsində əldə olunmuş harmoniyadır.
İlqar Muxtarov hazırda Azərbaycan və Müqəddəs Taxt-Tac arasında uğurlu əməkdaşlıq əlaqələrinin mövcud olduğunu, Heydər Əliyev Fondu vasitəsilə Vatikanda bəşəri əhəmiyyət kəsb edən bir sıra dini və mədəni abidələrin bərpası layihələrinin həyata keçirildiyini bildirib. Vurğulayıb ki, məhz bu uğurlu fəaliyyətin nəticəsi olaraq Azərbaycanın Birinci vitse-prezidenti Mehriban Əliyeva Papa Cəngavər Ordeninin ən ali dərəcəsi - IX Piy Ordeninin Böyük Xaçına layiq görülüb.
Səfir soydaşlarımızı hansı ölkədə yaşamasından asılı olmayaraq daim Azərbaycan və azərbaycançılıq naminə fəal iş aparmağa, xüsusilə sosial media şəbəkələrində və onlayn resurslarda ölkəmiz əleyhinə yayılan xəbərlərdə Azərbaycanla Ermənistan arasında cərəyan edən hadisələrin din zəminində baş verməsi kimi qələmə verilməsinə biganə qalmamağa çağırıb.
Ölkəmizin İtaliyadakı səfiri Rəşad Aslanov isə Dünya Azərbaycanlılarının Həmrəyliyi Gününün dövlətimiz və xalqımız üçün önəmli günlərdən biri olduğunu qeyd edib. Vurğulayıb ki, Azərbaycan xalqı bu günü əvvəlki illərdən fərqli - bütün əraziləri üzərində suverenliyini tam bərpa etmiş ölkənin nümayəndələri kimi böyük coşqu ilə qeyd edir.
Səfir yola saldığımız ildə xalqımızın müasir müstəqil Azərbaycanın memarı və qurucusu, Ümummilli Lider Heydər Əliyevin anadan olmasının 100 illik yubileyini qeyd etdiyini, 2023-cü ilin ölkəmizdə “Heydər Əliyev İli” olduğunu bildirib.
Rəşad Aslanov Ümummilli Liderin yorulmaz fəaliyyəti, Azərbaycan dövlətçiliyinin və müstəqilliyinin qorunmasındakı misilsiz xidmətlərindən bəhs edib. Ölkəmizin müstəqillik tarixində böyük rol oynamış Ulu Öndərin Azərbaycan xalqı tərəfindən daim yad olunacağı və əziz xatirəsinin dərin ehtiramla anılacağı vurğulanıb.
Diplomat dinamik inkişaf edən və strateji tərəfdaşlıq səviyyəsinə yüksələn Azərbaycan-İtaliya əlaqələrindən, hər iki ölkə rəhbərlərinin qarşılıqlı səfərlərinin əhəmiyyətindən, müxtəlif sahələri əhatə edən tərəfdaşlığın inkişaf perspektivlərindən də danışıb.
Tədbir konsert proqramı və bayram süfrəsi ilə başa çatıb.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
