300 bal toplayan naxçıvanlı şagird: Məqsədim maliyyəçi olmaqdır
Naxçıvan, 17 aprel, AZƏRTAC
Dövlət İmtahan Mərkəzi tərəfindən XI siniflər üçün martın 9-da keçirilən buraxılış imtahanlarının nəticələri elan olunub. Naxçıvanlı iki şagird maksimum – 300 bal toplayıb.
AZƏRTAC-ın bölgə müxbiri xəbər verir ki, həmin şagirdlərdən biri İbrahim Heydərovdur. O, Naxçıvan şəhər 11 nömrəli tam orta məktəbdə təhsil alır. İbrahim qazandığı uğurda müəllim və valideynlərinin böyük zəhmətləri olduğunu deyir. “İbtidai sinifdə oxuyandan bəri marağım dəqiq elmlərə idi. Ona görə ixtisas olaraq ikinci qrupu seçdim. Buraxılış imtahanları üzrə sınaqlarda nəticələrim yaxşı idi. 270-300 arası bal toplayırdım. Bu baxımdan valideynlərimin, müəllimlərimin gözləntisi böyük idi və sevinirəm ki, onların etimadını doğrultdum. Ən böyük arzum maliyyəçi olmaqdır. Atam da maliyyə sahəsində çalışıb və mən də onun yolunu davam etdirmək istəyirəm. Üzərimdə əziyyəti keçən müəllimlərimə minnətdarlıq edirəm. İnanıram ki, qəbul imtahanında da istədiyim nəticəyə nail olacağam”, - deyə o bildirib.
İbrahimin atası Xəyal Heydərov övladının yüksək nəticə qazanmasında əsas amili oxuduğu məktəbdə qurulan müasir tədris şəraiti və effektiv təlim metodlarının tətbiqi ilə əlaqələndirir. “İbrahim birinci sinfə gedəndən bu günə kimi dərslərini hər zaman yaxşı oxuyub. Planlı şəkildə çalışaraq, özünə düzgün istiqamət seçmişdi. Təbii ki, qazandığı nəticədə oxuduğu məktəbin də rolu böyükdür. Yeri gəlmişkən deyim ki, İbrahim vaxtilə mən məzun olduğum məktəbdə təhsil alır. Sevinirəm ki, mən qızıl medalla bitirdiyim məktəbi bu gün övladım ən yüksək nəticə ilə başa vurur”, - deyə o vurğulayıb.
“Məktəbin pedaqoji heyətinə təşəkkür edirəm. Orada nizam-intizam, dərsin keyfiyyəti yüksək səviyyədədir, bu gün onun bariz nümunəsini İbrahimin timsalında görürük. İbrahim oxuduğu sinifdə demək olar ki, bütün uşaqlar 200-dən yuxarı bal toplayıblar. Bu da ondan irəli gəlir ki, məktəbdə dərsin keyfiyyəti yaxşıdır. Həm məktəbdə tədrisin keyfiyyəti, eləcə də şagirdin nümunəvi olmağı, çalışqanlığı bu cür uğurlu nəticəyə yol açır. İbrahim Naxçıvan Muxtar Respublikası Təhsil Nazirliyinin təşkil etdiyi sınaqlarda da mütəmadi iştirak edirdi və yüksək nəticələr qazanırdı. Buna görə yaxşı bal toplayacağını təxmin edirdik. Çox sevinirəm və bu sevinci bütün valideynlərə arzu edirəm. Şagirdlərə də arzum budur ki, orta məktəbdə verilən tapşırıqları dərindən mənimsəməyə çalışsınlar”, - deyə valideyn Xəyal Heydərov əlavə edib.
Bölmənin digər xəbərləri
