Dağların qoynuna sığınan, böyük sənətkarın adını daşıyan, ölməz sənəti təbliğ edən məktəb VİDEO
Gədəbəy, 31 may, Vüsalə Cənnətova, AZƏRTAC
Kiçik Qafqaz dağlarının qoynunda yerləşən əsrarəngiz təbiətə malik Gədəbəy aşıqlar diyarıdır. Burada neçə-neçə sənətkar ecazkar musiqi aləti olan sazın eşqinə aşıq poeziyasının nadir incilərinə, dastanlara, saz havalarına həyat verib, milli-mənəvi dəyərlərimizi əsrlərdən-əsrlərə daşıyıb. Elə Azərbaycanda ilk dəfə yaradılan aşıq məktəbi də məhz Gədəbəy rayonunda fəaliyyət göstərir. Bu musiqi ocağının təməli 2009-cu il mayın 26-da Prezident İlham Əliyev tərəfindən qoyulub. 2013-cü ilin sentyabrında açılışı olan məktəbdə bir il sonra tədrisə başlanılıb. Bu ay Nazirlər Kabinetinin qərarı ilə Gədəbəy Aşıq Məktəbinə Azərbaycan aşıq sənətinin görkəmli nümayəndəsi, el sənətkarı Aşıq Ələsgərin adı verilib. Məktəbə üz tutanları da ilk olaraq onun həyətində Türk dünyasının görkəmli nümayəndəsi olan böyük aşığın heykəli salamlayır.
AZƏRTAC xəbər verir ki, Gədəbəy şəhərinin mərkəzində yerləşən, turistlərin də diqqətini çəkən musiqi ocağında tədrisin günün tələbləri səviyyəsində aparılması üçün bütün imkanlar mövcuddur. Binada aşıq sənətinə, musiqiyə aid kitab və nəşrlərlə zəngin kitabxana, qiraət, akt və konsert zalları, səsyazma studiyası, qrim otağı, yeməkxana da mövcuddur. Bu musiqi məktəbinin özəlliyini artıran mühüm amillərdən biri də burada aşıq musiqi sənəti ilə bağlı muzeyin olmasıdır. Muzeydə Gədəbəy aşıqları, o cümlədən ölkəmizin tanınmış saz ustadları haqqında məlumatlar toplanıb, aşıq sənətinə dair müxtəlif eksponatlar, qədim musiqi alətləri nümayiş etdirilir.
Gədəbəy aşıq məktəbində 103 şagirdin təhsili ilə 17 müəllim məşğul olur. Saz sinfində aşıq sənətində oxu və çalğı ifaçılığı, aşıq sənətinin tarixi, səhnə danışığı fənləri öyrədilir. Bundan başqa, balaban, nağara sinifləri də fəaliyyət göstərir. Təhsil müddəti 5 il olan məktəbə şagird qəbulu 9-13 yaşdan həyata keçirilir.
Gədəbəy Aşıq Məktəbinin direktoru Azər Ələkbərov bildirir ki, Azərbaycan xalqının çox qədim tarixi köklərə malik folkloru və mənəvi mədəniyyəti olan, UNESCO-nun mənəvi irs siyahısına daxil edilən ölməz aşıq sənətinin yetişən nəsillərə aşılanması, öyrədilməsi böyük məsuliyyətdir. “Nazirlər Kabinetinin qərarı ilə Gədəbəy Aşıq Məktəbinə Dədə Ələsgərin adının verilməsi bu məsuliyyəti birə-beş artırır. Biz bununla fəxr edirik və çalışacağıq ki, fəaliyyətimizi daha da təkmilləşdirək. Tədrisin keyfiyyətinin gündən-günə artması üçün əlimizdən gələni əsirgəməyəcəyik”, - deyən Azər Ələkbərov əlavə edib ki, içərisində qızların da olduğu Gədəbəy Aşıq Məktəbinin məzunları hər il Mədəniyyət və İncəsənət Universitetinə, Milli Konservatoriyaya və orta ixtisas musiqi təhsili ocaqlarına qəbul olunurlar. Məktəbin kollektivi Gədəbəyin və qərb bölgəsinin mədəni həyatına öz töhfələrini verir. Kollektiv bundan sonra da uğurlar qazanmağı hədəfləyir.
Bölmənin digər xəbərləri
