Yaxın beş ildə şimal-qərb bölgəsində daha 250 hektar qızılgül plantasiyası salınacaq VİDEO
Zaqatala, 2 iyun, AZƏRTAC
Zaqataladakı qızılgül plantasiyaları 2016-cı ildən fəaliyyət göstərir. İlkin mərhələdə 178 hektar sahədə efir yağlarının istehsalı üçün nəzərdə tutulmuş Dəməşq qızılgülü, 10 hektar ərazidə lavanda və nanə plantasiyaları salınıb.
AZƏRTAC-ın bölgə müxbiri xəbər verir ki, ixrac potensialı böyük olan, orqanik tərkibinə görə dünyada seçilən Azərbaycan istehsallı efir yağlarına tələbat ildən-ilə artdığına görə, qarşıdakı beş ildə Qəbələ, Oğuz, Şəki, Qax, Zaqatala və Balakən rayonlarında fermerlərlə müqavilə əsasında daha 250 hektar qızılgül plantasiyalarının əkilməsi nəzərdə tutulur.
May ayından bəri Zaqatalanın qızılgül plantasiyalarında canlanma hiss olunur. Hər səhər erkən saatlardan başlayaraq yüzlərlə insan qızılgül kollarının ətrafında məhsul yığımına cəlb olunur. Digər aylarda plantasiyada 60-70 nəfər daimi işlə məşğul olursa, mövsüm vaxtı işçilərin sayı 1500-1600 nəfərə çatır. Plantasiyalar damcı suvarma üsulu ilə suvarılır və heç bir kimyəvi dərman-gübrələrdən istifadə olunmur. Zərərvericilərə və alaq otlarına qarşı təbii üsullarla mübarizə aparılması ətraf mühitin və ekologiyanın qorunması ilə yanaşı, bioloji təmiz məhsul istehsalına imkan verir.
Plantasiyada rayonun əksər kənd və qəsəbələrindən gələn briqadalar fəaliyyət göstərir. Kəpənəkçi kəndindən gələn 35 nəfərlik qrupa Nüşabə İsayeva rəhbərlik edir. “Hər gün səhər tezdən, saat 6-dan gəlirik, qızılgül ləçəklərini şehli-şehli dərib müəssisəmizə çatdırırıq. Güllərimiz də yaxşıdır, məhsulumuz boldur. Gün ərzində komanda üzvlərimin hər biri 70-80 kiloqram gül ləçəyi toplayır. Günün sonunda məhsulu təhvil verib, pulumuzu alırıq”, - deyən Nüşabə İsayeva mövsüm boyu iş olduğunu və can-başla çalışdıqlarını bildirir.
Ötən ildən başlayaraq qızılgül plantasiyalarına yaxın ərazidə təcrübə məqsədilə şalfey bitkisi (ada çayı) də əkilib. Dünya parfüm sənayesində şalfey yağı, suyu daha çox istifadə olunur. Gələcəkdə şalfey bitkisi əkininin artırılması nəzərdə tutulur.
Müəssisənin istehsalat sahəsində yalnız qızılgül deyil, lavanda, nanə və digər bitkilərdən efir yağları almaq üçün müxtəlif ölçülü qazanları quraşdırılıb. Yaxın gələcəkdə bitkilərdən ekstraktların alınması üçün istehsalat fabrikinin inşaası da planlaşdırılır.
İstehsalat rəhbəri Təbriz Allahverdiyevin sözlərinə görə, müəssisədəki avadanlıqların köməyi ilə həm də təbiətdə yetişən yovşan, boymadərən, şam ağacı, kəklikotu, rozmarin, razyana, çobanyastığı və digər bitkilərdən efir yağları istehsal edilərək beynəlxalq sərgilərdə nümayiş olunur və potensial müştərilərə təqdim edilir.
Təbriz Allahverdiyev onu da bildirib ki, dünya üzrə ümumi illik qızılgül efir yağı istehsalı 4000–5000 kiloqram civarındadır ki, hazırda bu həcmin 200 kiloqramı Zaqatalanın payına düşür. Hədəf gələcəkdə qızılgül efir yağının istehsal həcmini 330-350 kiloqrama çatdırmaqdır.
Müəssisə dünyada orqanik qızılgül istehsalı üzrə ixtisaslaşan ən böyük istehsalçıdır. Məhsullarını əsasən Yaponiya, Birləşmiş Ərəb Əmirlikləri, Səudiyyə Ərəbistanı, Türkiyə, Polşa, İngiltərə, Almaniya, Fransa, ABŞ, Litva və digər ölkələrdən olan şirkətlərə ixrac edir.
Bölmənin digər xəbərləri
