YÖS-də yüksək nəticə qazanan astaralı məktəblinin uğuru VİDEO
Astara, 9 iyul, İlkin Adıyev, AZƏRTAC
Saysız-hesabsız diplomlar, fəxri fərmanlar, sertifikatlar… Onların hər biri zəhmət, istedad və güclü iradə sayəsində qazanılıb. Bütün bu uğurlar Astara rayonunun Təngərüd kənd tam orta məktəbinin builki məzunu Fatimə Gənciyevanın adına yazılıb. O, hələ cəmi 14 yaşı olanda Türkiyənin iki nüfuzlu universitetindən yüksək nəticə ilə qəbul cavabı alıb. Ancaq gedə bilməyib. İllər keçdi, zəhməti, əzmi və intellekti onu bir daha uğura apardı. Bu il orta məktəbi uğurla başa vuran Fatimə həmin nailiyyətini yenidən təkrarlayıb. O, Türkiyədə yenidən nüfuzlu ali məktəblərə qəbul olunsa da, paralel olaraq Azərbaycanda da universitetə daxil olmaq məqsədilə sənədlərini təqdim edib.
AZƏRTAC-ın bölgə müxbiri xəbər verir ki, 16 yaşlı Fatimənin uğur yolu, gənc yaşında göstərdiyi iradə və gələcəyə olan baxışı bir çoxlarına örnək ola bilər. Qarşıda isə onun hədəfi daha böyükdür: həm elmi biliklərini inkişaf etdirmək, həm də iki ölkə arasında təhsil körpüsünün bir parçası olmaq.
Fatimənin təhsil uğurları təsadüfi deyil, o, bu yolu illər əvvəl özü üçün müəyyənləşdirib. Hələ 9-cu sinifdə oxuyarkən Türkiyədə ali təhsil almaq üçün ilk cəhdini edib. YÖS – Yabancı Öğrenci Sınavı proqramı vasitəsilə imtahan verərək yüksək nəticə əldə edib və bu nəticə sayəsində iki nüfuzlu universitetdən – Atatürk Universitetinin Hüquq fakültəsindən və Ankara Universitetinin Tibb fakültəsindən qəbul üçün müsbət cavab alıb. Lakin beynəlxalq qəbul prosesinin tələb etdiyi sənədlər – yəni 10-cu və 11-ci siniflərin qiymət cədvəlləri hələ hazır olmadığından bu fürsəti həmin vaxt dəyərləndirə bilməyib. Bu il isə o, həmin uğurunu yenidən təkrarlamağı bacarıb.
Astaralı məktəbli öz gücünə arxalanıb, heç bir repetitor köməyi olmadan, müstəqil şəkildə hazırlaşaraq yüksək nəticə əldə edib. Dörd fənn üzrə keçirilən imtahan (riyaziyyat, həndəsə, məntiq (İQ) və türkcə fənləri) ciddi hazırlıq tələb edirdi. Fatimə isə bütün bu sahələr üzrə fərdi şəkildə çalışıb: “YÖS imtahanı, ümumilikdə, dörd fənn üzrə keçirilir: riyaziyyat, həndəsə, məntiq – yəni İQ və türkcə. Həndəsə dedikdə bildiyimiz geometriya nəzərdə tutulur, İQ isə məntiqi düşünmə bacarığıdır. İmtahan bu il, mayın 25-də oldu. Onlayn şəkildə təşkil edilmişdi. Mən heç bir kursa, repetitor yanına getmədim. Özüm hazırlaşdım. Lazım olan kitabları internetdən tapdım, telefonuma və kompüterimə yükləyib oradan oxuyurdum. Gün ərzində müəyyən vaxtlar ayırır, testlər işləyir, səhvlərimi analiz edirdim”.
Bildirir ki, bəzən çətinlikləri olub, başa düşmədiyi mövzularla da qarşılaşıb. Amma internetdə izahlı videolar tapıb, araşdırıb. Hərdən motivasiyası aşağı düşsə də, özünə söz verib ki, YÖS imtahanında yaxşı nəticə göstərəcək. Və belə də olub - 671 bal. “Həmin anı heç vaxt unuda bilmərəm. Bu balı öz gücümlə, heç kimdən yardım almadan qazandığım üçün qürur hissi keçirirəm. Özümə inamım birə-beş artdı. İndi düşünürəm ki, əgər doğrudan da istəyirsənsə və əziyyət çəkməkdən çəkinmirsənsə, hər şey mümkündür” , - deyir Fatimə.
Həmsöhbətim topladığı yüksək balla oxuyacağı ixtisası və universiteti də artıq seçib. O, dövlət idarəçiliyi sahəsində qiyabi təhsil almaq qərarına gəlib. Bununla yanaşı, Azərbaycanda da təhsil almağı planlaşdırır. Özü də hərbi sahədə.
“Həm Türkiyədə oxumaq istəyirdim, həm də Azərbaycanda. Hərbçilərə böyük rəğbətim var. Buna görə də Heydər Əliyev adına Hərbi İnstituta sənəd verməyi düşünürəm. Burada müəyyən ixtisaslar var – ekologiya üzrə, elektronika üzrə və rabitə mühəndisliyi. Mən rabitə mühəndisliyi üzrə təhsil almaq istəyirəm” , – deyə o əlavə edir.
İmtahanda yüksək nəticə əldə edən Fatimə indi tələb olacağı günü səbirsizliklə gözləyir.
Bölmənin digər xəbərləri
